Uniformizohen pikat doganore të Shqipërisë. Rikualifikim dhe elemente identifikues për secilën pikë tokësore

Të gjithë pikat kufitare të Shqipërisë i janë nënshtruar rikualifikimit, falë një projekti që ka bashkuar Ministrinë e Turizmit, Kulturës dhe Ministrinë e Infrastrukturës. Zëvëndëskryeministrja dhe ministrja e Infrastrukturës Belinda Balluku, e shoqëruar nga kreu i Doganave, kreu i ARRSH-së dhe ai i Bashkisë së Pogradecit inspektoi pikën doganore të Qafë Thanës, ku rikualifikimi ka përfunduar.

“Kemi vendosur që të krijojmë një uniformizim të të gjitha pikave hyrëse në Republikën e Shqipërisë, pikave kufitare nga toka” tha Balluku duke evidentuar se pritshmëritë për turistët e huaj këtë vit kanë tejkaluar edhe parashikimet optimiste të mëparshme.

Projekti parashikon stil arkitekturor për të gjitha pikat doganore tokësore, me elemente identifikues të veçantë që kanë në fokus t’i japin mikpritjen e pare vizitorëve e po ashtu edhe investime infrastrukturore që lehtësojnë ardhjen e tyre në Shqipëri.

Në fjalën e tij, kreu i Drejtorisë së Doganave Gent Gazheli evidentoi se kjo është një nga pikat më të rëndësishme doganore për kalimin e mallrave dhe pasagjerëve. Ndërkohë, kjo pikë kufitare është pjesë e projektit të Korridorit 8 dhe parashikohet të kthehet në një pikë ‘One stop shop’.

SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.