Vaji i ullirit, strategjia e Spanjës fut në krizë Italinë – Brenda pak viteve çmimet janë rritur me 240%

Prodhuesit dhe industrialistët italianë të vajit të ullirit, prej vitesh ankohen për vlerësimin e dobët që i bëhet produktit të tyre. Ata drejtojnë gishtin nga çmimet në treg që ishin shumë të ulëta dhe mezi mbulonin kostot e prodhimit. Por, tani që vaji i ullirit ekstra i virgjër më në fund tregtohet me çmime mbi 7 apo 8 euro për shishe, ata po kuptojnë se ka pak për të festuar.

Efekti i menjëhershëm ishte rënia e konsumit, i cili në të ardhmen shqetëson edhe ata që kanë forcuar të ardhurat e tyre në këtë moment. Sipas të dhënave nga Circana, një kompani e specializuar në analizën e sjelljes së konsumatorëve në tregtinë italiane me pakicë në shkallë të gjerë, në dhjetë muajt e parë të 2023-shit, shitjet e vajit të ullirit ekstra të virgjër ranë me 9%.

Gjërat nuk janë më mirë në nivel ndërkombëtar, duke qenë se sipas të dhënave të siguruara vetëm pak ditë më parë nga Komisioni Europian, konsumi global i vajit të ullirit ekstra të virgjër ra me 18% në vitin 2023. Është e vërtetë, ekonomia botërore është ende e penalizuar nga inflacioni, i cili, megjithatë, i vetëm nuk mjafton për të shpjeguar rritjet në listat e çmimeve të produkteve si vaji i ullirit ekstra i virgjër.

Elementi i parë kyç është kolapsi i prodhimit spanjoll i cili në vetëm pak vite shkoi nga 1.8 milion ton në 2018-2019 në 1.4 milion në 2020-2021 dhe 2021-2022 në vetëm 663 mijë në fushatën 2022-2023. Për të plotësuar tablonë e prodhimit global: 241 mijë tonë të prodhuara në Itali, 240 mijë në Greqi, 180 mijë në Tunizi dhe 126 mijë në Portugali.

Rënia spanjolle u shkaktua nga thatësira: ullishtet super intensive të mbjella në Spanjë kërkojnë trefishin e sasive të ujit në krahasim me një ullishte italiane. Kështu, me uljen e disponueshmërisë së ujit, prodhimi është prekur. Varieteti i ri filloi të prodhojë vetëm dy vjet pas mbjelljes.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.