10 mln euro grante për ndryshimet klimatike – Gati marrëveshja për programin Interreg. Do të përfitohen përmes projekteve  

Shqipëria pritet të përfitojnë 10 mln euro grante në 6 vitet e ardhshme nga ratifikimi i marrëveshjes me qeverinë franceze dhe Komisionit Europian, për pjesmarrjen në programin Interreg EURO–MED.

Projektligji ka mbërritur në Kuvend për miratim, ndërsa sipas relacionit shoqërues i gjithë programi ka një vlerë prej 293.6 mln euro dhe përfshin 10 vende të Bashkimit Evropian dhe 4 vende kandidate për IPA, që janë Shqipëria, Bosnje-Hercegovina, Mali i Zi dhe Maqedonia e Veriut.

Kjo marrëveshje i mundëson Shqipërisë dhe të gjithë partnerëve potencialë shqiptarë (publikë dhe jopublikë) që të marrin pjesë në këtë program nëpërmjet projekteve të ndryshme. Ndërkohë që, përfitues potencialë janë persona juridikë, autoritete vendore, organe publike, organizata joqeveritare, ndërmarrjet e vogla dhe të mesme, etj.

Ndërkaq, në përputhje me fokusin e Bashkimit Evropian në objektivat mjedisorë dhe klimatikë, mjedisi është tema kryesore për programin Interreg EURO-MED, i cili garanton vazhdimësinë e programit Interreg MED të periudhës 2014-2020.

Propozimi i Komisionit për Kuadrin Financiar Shumëvjeçar 2021-2027 përcakton një objektiv më ambicioz për integrimin e klimës në të gjitha programet e Bashkimit Evropian, me synimin e përgjithshëm që 30% e shpenzimeve të BE-së të kontribuojnë në objektivat klimatikë.

Kjo masë reflekton rëndësinë e trajtimit të ndryshimeve klimatike, në përputhje me angazhimet e Bashkimit Evropian për të zbatuar marrëveshjen e Parisit dhe objektivat e zhvillimit të qëndrueshëm të Kombeve të Bashkuara.

Ola Mitre /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.