25% e gjermanëve nuk shkojnë me pushime këtë verë – Një në katër nuk mund të përballojnë as shpenzimet e një jave

Edhe në Gjermaninë e begatë janë të shumtë ata që këtë verë nuk kanë para për të shijuar qoftë edhe një javë pushim. Përqindja e saktë nuk është e qartë. Sipas një sondazhi të fundit nga instituti Forsa në emër të rrjetit RTL , 19% e të anketuarve, pra pothuajse një në pesë, thonë se nuk mund të përballojnë të shkojnë me pushime këtë verë. Por një studim i mëvonshëm nga instituti Civey në një kampion më të madh statistikor, në emër të revistës Der Spiegel, e rrit këtë shifër në 25%. Kjo do të thotë se një në katër do të privohen nga pushimet.

Në verën e 2019-ës, para pandemisë, vetëm një në shtatë gjermanë deklaroi në sondazhet përkatëse se nuk mund të bënte pushime. Për më tepër, sipas raportit vjetor të Shoqatës Federale të Organizatave për Mbrojtjen e Konsumatorit, 56% e të anketuarve do të bëjnë “më pak pushime”, ndërsa 61% do të shpenzojnë më pak para këtë vit për “daljet në bare dhe restorante”.

Me interes është tregu turistik francez dhe marrëdhënia e tij tashmë “e vështirë” me publikun gjerman. Teorikisht, Franca ishte dhe mbetet një nga zgjedhjet e preferuara të gjermanëve për verën dhe kjo vlen jo vetëm për Parisin dhe Cote d’Azur, por edhe për destinacionet më pak të njohura. Megjithatë, sipas të dhënave të Organizatës Franceze të Turizmit, këtë vit vetëm 6% e gjermanëve vendosën të shkojnë me pushime në Francë, ndërsa në vitin 2022 përqindja përkatëse do të arrijë në 10%.

Mesatarisht, shpenzimet ditore për frymë të turistëve gjermanë në Francë nuk i kalojnë 141 euro. Vetëm belgët me 132 euro dhe japonezët me 131 euro shpenzojnë më pak. Përkundrazi, vizitorët më “bujarë” janë amerikanët me 208 euro në ditë, spanjollët 180 euro dhe kinezët 175 euro. Në përgjithësi, megjithatë, të ardhurat për turizmin francez duket se po rriten me të paktën 20% krahasuar me vitin 2019.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.