Debatet për pensionet në Itali – Partitë shpalosin propozimet e tyre në prag të zgjedhjeve

Në prag të zgjedhjeve, në Itali partitë kanë shpalosur planet e tyre për pensionet. Qendra e djathtë në programin e saj të përbashkët thekson domosdoshmërinë e rritjes së pensioneve minimale. Liderja e Fratelli d’Italia, Giorga Meloni u shpreh se nuk ka një shifër të saktë pasi fillimisht duhet kuptuar se sa mund të aplikohet kjo masë dhe sa do të jetë shtesa. Ajo shtoi se pensionet minimale janë të papërshtatshme dhe mënyrat për të përmirësuar situatën përballë rritjes së inflacionit mund të gjenden në një sistem që shpenzon rreth 110 miliard euro në bonuse të panevojshme dhe që shpenzon 780 euro për person për të ardhurat bazë.

Ndërsa Forza Italia jep shifra të caktuara duke kërkuar rritjen deri në një mijë euro të pensioneve minimale. Një propozim tjetër është që pensioni të ndahet në 13 muaj.

Domosdoshmëria e fortë për rishikimin e pensioneve në Itali është një çështje që nuk mund të shtyhet për Legën. Objektivi kryesor është ndryshimi i ligjit Fornero me kuotën 41. Sipas këtij ligji, të punësuarit përfitojnë të drejtën për pension të parakohshëm nëse kanë 41 vjet që derdhin kontribute. Ndërsa për të punësuarat femra mosha e pensionit duhet të jetë 63, me të paktën 20 vjet kontribute.

Partia demokratike nga ana e saj prezanton një plan të jashtëzakonshëm për punësimin femëror, sepse sipas kësaj partie pengesat që femrat hasin për të marrë pjesë në jetën ekonomike, janë një goditje për dinjitetin dhe lirinë e tyre për zgjedhje. Partia demokratike këmbëngul se rritja e punësimit të femrave është e vetmja rrugë për të përballuar me sukses dy sfidat e mëdha: prodhimi i ulët dhe mbështetja e sistemit të pensioneve.

Lëvizja me Pesë Yje e ka përqendruar propozimin e saj në rritjen e pensioneve të invadilitetit për personat me aftësi të kufizuar.

E majta italiane dhe të Gjelbërit propozojnë daljen në pension në moshën 62 vjeç me 41 vite kontribute, duke njohur dhe periudhën që personat kanë qëndruar pa punë jo me vullnetin e tyre. Dhe në këtë rast pensioni minimal kërkohet të jetë 1 mijë euro.

Edhe më majtas, Unioni popullor propozon anulimin e ligjit Fornero duke caktuar moshën 60 vjeç për daljen në pension me 35 vite kontribute. Dhe kjo lëvizje cakton shumën e 1 mijë eurove si pension minimal, si dhe propozon që pensionet e ardhshme maksimale dhe akumulimi i përfitimeve pensionale të jetë prej 5 mijë euro në muaj.

Dorina Kurtaj / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.