Euro, e qëndrueshme në mbi 1.06 USD – Tregu karakterizohet nga luhatje të vogla për shkak të festave të fundvitit
Euro po tregtohet e qëndrueshme në mbi 1.06 dollarë edhe në sesionin e sotëm, ndërsa tregu po karakterizohet nga qëndrueshmëria. Ndërkohë, jeni japonez është ngjitur sërish në nivelin më të lartë në 4 muajt e fundit, në raport me dollarin, pas vendimeve të Bankës së Japonisë për të mos ndryshuar normat e interesit dhe për të kontrolluar yield-in e obligacioneve.
Dollari është dobësuar lehtë edhe për shkak të të dhënave në SHBA, që treguan një rritje të besimit konsumator në nivelin më të lartë në 8 muajt e fundit, gjatë dhjetorit, në një kohë që inflacioni po ngadalësohet dhe tregu i punës po qëndron i fortë. Indeksi që mat ecurinë e dollarit amerikan, përballë shportës me gjashtë monedhat kryesore ndërkombëtare, po qëndron në rreth 103.9, shumë pranë nivelin më të ulët në 6 muajt e fundit.
Analistët parashikojnë se, ditën e mbetura të dhjetorit do të karakterizohen nga qëndrueshmëria për shkak se nuk pritet të ketë të dhëna ekonomike të rëndësishme, ndërsa investitorët bëjnë bilancet e vitit. Javën e kaluar, Rezerva Federale, Banka Qendrore Europiane, Banka e Anglisë dhe Banka Kombëtare e Zvicrës vendosën të rrisin normën bazë të interesit me gjysmë pikë përqindje, për të luftuar inflacionin e lartë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.