Kreu i ri i NATO-s thekson mbështetjen për Ukrainën – Rutte, “i pashqetësuar” për pasojat e zgjedhjeve të SHBA brenda aleancës

Kristi Ceta/SCAN

 

Kreu i ri i NATO-s, Mark Rutte shprehu mbështetje të fortë për Ukrainën dhe tha se nuk ishte i shqetësuar për zgjedhjet e ardhshme presidenciale në SHBA, pasi mund të punonte me secilin nga kandidatët.

Rutte mori detyrën nga Jens Stoltenberg si Sekretar i Përgjithshëm i NATO-s të martën, vetëm disa javë përpara zgjedhjeve presidenciale të SHBA-së, që vendos nënpresidenten demokrate Kamala Harris kundër republikanit Donald Trump. Ish-presidenti Trump ka qenë kritik ndaj NATO-s kohët e fundit, duke refuzuar gjithashtu të thotë nëse ai dëshiron që Ukraina të fitojë luftën kundër pushtimit të Rusisë.

“Ne duhet të sigurohemi që Ukraina të mbizotërojë si një komb sovran, i pavarur dhe demokratik”, u tha ish-kryeministri holandez Rutte gazetarëve në selinë e NATO-s në Bruksel.

Lufta në Ukrainë e ka kthyer NATO-n sërish në qendër të çështjeve ndërkombëtare, pas themelimit në vitin 1949 për të mbrojtur Evropën Perëndimore kundër çdo sulmi nga Bashkimi Sovjetik.

Rutte hodhi poshtë shqetësimet brenda aleancës transatlantike për zgjedhjet në fuqinë mbizotëruese të NATO-s, duke thënë se nuk ishte i shqetësuar, pasi të dy kandidatët i njihte shumë mirë.

Zyrtarët dhe diplomatët e NATO-s presin që Rutte të ruajë prioritetet e Stoltenberg, duke shtuar mbështetjen për Ukrainën e duke i shtyrë vendet anëtare të shpenzojnë më shumë për mbrojtjen Gjithashtu, synohet angazhimi i SHBA-së në sigurinë evropiane.

Stoltenberg, një ish-kryeministër i Norvegjisë, dha dorëheqjen si shef i aleancës prej 32 anëtarësh pas një dekade të trazuar të shënuar mbi të gjitha nga pushtimi i Ukrainës nga Rusia në vitin 2022.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.