A do të sjellë kriza politike një krizë ekonomike në Portugali?

Votimi i buxhetit është ngjitësi që mban të bashkuar parlamentin portugez, por mes një skandali korrupsioni që ka ‘mpirë’ gati qeverinë, çfarë vjen më pas për ekonominë e dobët të vendit? Portugalia do të mbajë zgjedhje të parakohshme parlamentare më 10 mars 2024, tha të enjten Presidenti Marcelo Rebelo de Sousa, pas dorëheqjes së papritur të kryeministrit socialist të vendit në mes të një hetimi korrupsioni.

Megjithatë, presidenti tha se ai do të shpërndajë parlamentin vetëm pas votimit përfundimtar mbi projektligjin e buxhetit të vitit 2024, që do të pritet më 29 nëntor. Duke qenë se Partia Socialiste (PS) ka shumicën e mandateve, nuk ka shumë dyshime se buxheti do të kalojë.

Rebelo de Sousa tha se lejimi i deputetëve për të miratuar buxhetin do t’i lejojë ata të përmbushin “pritjet e shumë qytetarëve portugez” dhe të investojnë fondet e rimëkëmbjes së BE në projekte të ndryshme.

Vendimi për thirrjen e zgjedhjeve të parakohshme pritet të ketë një ndikim pozitiv në ekonomi, sipas ekspertëve, pavarësisht nga efekti zakonisht i dëmshëm i paqëndrueshmërisë politike.

Mes tkurrjes së PBB-së së vendit dhe krizës së kostos së jetesës, buxheti premton norma më të ulëta të tatimit mbi të ardhurat për klasën e mesme, përfitime sociale të fokusuara tek më të varfërit dhe një rritje prej 24% në investimet publike për të nxitur ngadalësimin e rritjes ekonomike.

Sondazhet e opinionit janë të pakta, por ato pak që ekzistojnë sugjerojnë se opozita e qendrës së djathtë, Social Demokratët (PSD) janë kandidatët kryesorë të mundshëm për zgjedhjet e vitit të ardhshëm. Megjithatë ka dyshime për aftësinë e partisë për të krijuar mbështetje të mjaftueshme për të formuar një qeveri të qëndrueshme.

Partitë radikale mund të përfitojnë nga kriza politike, veçanërisht Bloco de Esquerda në të majtën ekstreme dhe – ndoshta edhe më shumë – Chega në ekstremin e djathtë, duke e bërë edhe më të vështirë arritjen e aranzhimeve të qëndrueshme qeverisëse dhe duke rrezikuar stabilitetin fiskal.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.