Banka e Izraelit mban normën bazë të interesit të pandryshuar pavarësisht luftës!

Pavarësisht ekonomisë së tronditur nga lufta, Banka Qendrore e Izraelit e ka mbajtur normën bazë të interesit në 4.75%.

Banka e Izraelit mbajti të pandryshuara normat e huamarrjes afatshkurtra për një vendim të tretë radhazi siç pritej të hënën, pasi politikëbërësit shqetësoheshin për rindezjen e inflacionit pavarësisht nga dobësimi i ekonomisë si rezultat i luftës së Izraelit kundër Hamasit.

Banka qendrore mbajti normën e saj bazë në 4.75% – niveli i saj më i lartë që nga fundi i vitit 2006. Ajo i kishte rritur normat 10 herë radhazi në një cikël shtrëngues agresiv që e ka marrë normën nga 0.1% prillin e kaluar përpara se të ndalonte në korrik dhe përsëri në gusht.

Norma e inflacionit u zbut në 3.8% në shtator nga 4.1% në gusht për të qëndruar mbi objektivin vjetor 1-3%.

Zyrtarët kanë paralajmëruar se ulja e madhe e normës për momentin do të dobësonte më tej shekelin që tashmë është në nivelin më të ulët prej 8 vitesh e gjysmë kundrejt dollarit dhe do të rriste inflacionin.

Për të stabilizuar shekelin, Banka e Izraelit njoftoi një program për të shitur deri në 30 miliardë dollarë (28.24 miliardë euro) në valutë të huaj dhe një program për të bërë transaksione shkëmbimi deri në 15 miliardë dollarë në tregun e këmbimit valutor.

Banka pranon se lufta po jep efekte të ndryshme ekonomike, si në aktivitetin real, ashtu edhe në tregjet financiare. Megjithatë, thonë se kjo e fundit po funksionon dhe një pjesë e madhe e aktivitetit ekonomik po vijon si zakonisht.

Banka e Izraelit ka rishikuar parashikimin e saj makroekonomik, duke parashikuar një rritje të PBB-së me 2.3% në 2023 dhe 2.8% në 2024, nga 3% në të dy vitet, duke supozuar se konflikti do të frenohet në kufirin jugor të vendit.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.