Bankat, huadhënësi më i madh i Qeverisë – 62% e borxhit publik u mor nga sistemi bankar, 12% nga individët përmes bonove

Sistemi bankar mbetet huadhënësi më i madh i Qeverisë kur vjen fjala te borxhi i brendshëm, i pasuar nga qyetarët, të cilët renditen në vendin e dytë sa i përket financimit të huasë publike përmes bonove të thesarit dhe obligacioneve. Sipas të dhënave zyrtare të Ministrisë së Financave, 62.2% e borxhit të brendshëm është marrë nga sistemi bankar, 7.9% e të cilit u përket klientëve të bankave. Në vend të dytë renditen individët, pesha e të cilëve në totalin e huamarrjes së brendëshme është 12.9%.

Në vend të tretë renditen istitucionet financiare, investimet e të cilave në letra me vlerë të borxhit qeveritar arrijnë në 12.5% të totalit. Në vend të katërt për nga pesha në totalin e borxhit të brendshëm renditet Banka e Shqipërisë, së cilës Qeveria i është drejtuar për 8.3% të totalit të huamarrjes së brendëshme. Ndërsa në fund, renditen institucionet jofinanciare, që zënë së bashku 3.8% të borxhit të brendshëm.

Në total, stoku i borxhit të brendshëm në mes të këtij viti rezulton 762,9 miliardë lekë, me rritje prej 30 miliardësh krahasuar me fundin e vitit të shkuar. Për t’u nënvizuar është që qeveria po përjeton situatë të favorshme normash interesi edhe për borxhin e brendshëm, ashtu si edhe në atë të jashtmin. Edhe pse norma bazë e interesit të Bankës së Shqipërisë është në nivele rekord prej 3%, yieldet e bonove të thesarit luhaten shumë pak me lartë se ky prag.

Megjithëse në realitet borxhi publik ka vijuar të rritet përgjatë këtij viti, duke kaluar pragun e 1.4 trilionë lekëve, vlera në raport me Prodhimin e Brendshëm Bruto rezulton 64.7% në qershor, me rënie prej plot 10% krahasuar me vitet 2020-2021.

Huaja shtetërore rezulton në muajin qershor 13.2 miliardë euro, rreth 1.2 miliardë euro më shumë se një vit më parë. Rënia në raport me Prodhimin e Brendshëm Bruto i detyrohet tërësisht rritjes së PBB për shkak të çmimeve dhe kursit të këmbimit. Vlerat e borxhit janë llogaritur në dokument nga Ministria e Finnacave me kursin euro-lek 106 lekë, në një kohë që monedha e përbashkët po lundron këto muaj në ujëra edhe më të cekta. Matur me kursin aktual të këmbimit, borxhi publik është edhe më e i ulët se 64.7% i Prodhimit të Brendshëm Bruto.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.