Bankat qendrore lëvizin për të parandaluar krizën pas blerjes së Credit Suisse nga rivali i saj UBS!

Banka Qendrore Europiane i është bashkuar homologes së saj amerikane dhe bankave qendrore nga katër vende të tjera në një përpjekje të koordinuar për të qetësuar tregjet pasi banka zvicerane UBS njoftoi se do të blinte rivalin e saj Credit Suisse për 3 miliardë euro.

Banka e Anglisë, Japonisë, Kanadasë, BQE, Rezerva Federale e SHBA dhe Banka Kombëtare Zvicerane bënë njoftimin të dielën dhe thanë se masa do të “rrisë ofrimin e likuiditetit” dhe do t’i lejojë bankat të marrin hua direkt.

Marrëveshja do të qëndrojë në fuqi të paktën deri në fund të prillit dhe do të hapë një rrjet linjash shkëmbimi midis bankave në fjalë. Bankat qendrore që tashmë lehtësojnë transaksionet në dollarë amerikanë kanë rënë dakord të ofrojnë operacione 7-ditore në dollarë amerikanë në baza ditore.

BQE ka premtuar të mbështesë bankat e eurozonës me kredi nëse kërkohet, duke pasqyruar një marrëveshje të ngjashme që u prezantua gjatë pandemisë COVID-19 për të pakësuar ndikimin në ofertën e kredisë për familjet dhe bizneset.

Në një deklaratë, Presidentja i Bankës Qendrore Europiane tha se mirëpriste veprimin e shpejtë dhe vendimet e marra nga autoritetet zvicerane pasi ato janë të dobishme për rivendosjen e kushteve të rregullta të tregut dhe sigurimin e stabilitetit financiar.

“Në çdo rast, paketa jonë e politikave është e pajisur plotësisht për të ofruar mbështetje likuiditeti për sistemin financiar të zonës së euros nëse është e nevojshme dhe për të ruajtur tranzicionin e qetë të politikës monetare,” përfundoi Lagarde.

Ndërkohë, UBS tani do të regjistrojë deri në 5.7 miliardë euro humbje dhe marrëveshja pritet të mbyllet në fund të vitit.

Marrëveshja vjen pas përpjekjeve të tjera në Europë dhe SHBA për të mbështetur sektorin bankar që nga rënia e huadhënësve amerikanë Silicon Valley Bank dhe Signature Bank. Të premten aksionet europiane shënuan javën e tyre më të keqe në pesë muaj.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.