BE kundër sulmeve kibernetike – Plan 1.2 miliardë euro përballë kërcënimeve në rritje

Komisioni Europian konfirmoi një plan prej 1.2 miliardë euro për t’u përballur me kërcënimet në rritje ndaj sigurisë kibernetike, duke nënvizuar shqetësimet për një seri incidentesh hakerimi të profilit të lartë.

Përdorimi i luftës kibernetike në konfliktin ushtarak midis Rusisë dhe Ukrainës ka shkaktuar gjithashtu alarm. Me anë të një deklarate për media, ekzekutivi i BE – së konfirmoi se Akti i Solidaritetit Kibernetik do të forcojë solidaritetin për të zbuluar, përgatitur dhe përgjigjur më mirë incidenteve të rëndësishme ose në shkallë të gjerë të sigurisë kibernetike, duke krijuar një Mburojë Europiane të Sigurisë Kibernetike dhe një Mekanizëm gjithëpërfshirës të Emergjencës Kibernetike.

Mburoja do të përbëhet nga Qendra Operacionale të Sigurisë kombëtare dhe ndërkufitare, të cilat do të përdorin teknologjinë më të fundit, të tilla si inteligjenca artificiale dhe analitika e avancuar e të dhënave, për të zbuluar kërcënimet dhe incidentet kibernetike ndërkufitare. Mekanizmi i Emergjencës Kibernetike do të testojë subjektet në sektorë shumë kritikë si kujdesi shëndetësor, transporti dhe energjia.

Plani përfshin gjithashtu ngritjen e një rezerve të sigurisë kibernetike të BE-së, e përbërë nga shërbime të reagimit ndaj incidenteve, të cilat do të ndërhyjnë me kërkesë të një vendi apo institucioni të BE-së në rast të një incidenti të rëndësishëm ose në shkallë të gjerë të sigurisë kibernetike. Akti i Solidaritetit Kibernetik do të kërkojë marrëveshje nga vendet e BE-së dhe Parlamenti Europian përpara se të kthehet në ligj.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.