Britani, 2.5 milionë familje në prag të varfërisë – Mund të kenë nevojë për mbështetje që të paguajnë faturat

Rreth 2.5 milionë familje në Britani janë në një “rrezik të lartë” të cenueshmërisë financiare, ose problemeve të tjera dhe mund të kenë nevojë për mbështetje për të paguar faturat e tyre. Të dhënat janë rezultat i një studimi të ri që gjurmon ndikimin e krizës së kostos së jetesës.

Analiza bazohet në numrin e familjeve që janë të regjistruara në Shërbimin e Regjistrimit të Vulnerabilitetit – i cili njofton kompanitë për problemet financiare që prekin klientët e tyre – dhe shtrihet në të gjithë popullsinë e vendit.

Studimi parashikoi se si dhe 2.4 milionë familje reultojnë në “rrezik të lartë”, ndërsa 6.3 milionë ishin në një rrezik “të ngritur” të cenueshmërisë, që do të thotë se ata mund të kenë nevojë për një mbështetje për të paguar faturat e tyre. Në vitin 2022, në Mbretërinë e Bashkuar kishte rreth 28 milionë familje.

Britania po pëson shtrëngimin më të madh të standardeve të jetesës që nga fillimi i regjistrimeve në vitet 1950, pasi pagat nuk arrijnë të përballojnë inflacionin në rritje dhe situata pritet të intensifikohet pasi kreditë dhe qiratë po rriten në mënyrë të vazhdueshme.

Deri më tani, rezultatet e korporatave dhe të dhënat zyrtare sugjerojnë se shumica e konsumatorëve kanë arritur të ruajnë ritmin e tyre të shpenzimeve, me kursime të krijuara gjatë pandemisë COVID-19 mbi nivelet e tyre të vitit 2019 dhe shkallën e papunësisë pranë më të ulëtit që nga viti 1974.

Por, niveli i inflacionit për konsumatorët u zbulua në shifrat zyrtare të shitjes me pakicë javën e kaluar, të cilat treguan se shpenzimet në terma të vlerës në maj ishin 17% më të larta se në shkurt 2020, pak para goditjes së pandemisë, por vëllimet ranë me 0.8%.

Supermarketet thonë se shumë klientë kanë ulur blerjet duke synuar njëkohësisht produktet më të lira. Sipas sondazhit, presioni më i madh u ndje në veriperëndim dhe verilindje të Britanisë, ku katër në 10 shtëpi u konsideruan të jenë në rrezik të lartë ose të ngritur të cenueshmërisë.

Autoriteti i Sjelljes Financiare, një rregullator që prezantoi të dhënat, tha muajin e kaluar se numri i njerëzve që luftonin për të paguar faturat dhe shlyerjet e kredisë ishte rritur me 3.1 milionë që nga maji 2022 në 10.9 milionë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.