“Bursa e energjisë, sfidë përdorimi nga operatorët privatë” – Komuniteti i Energjisë: Likuiditeti, duhet operimi brenda së njëjtës ditë dhe bashkim i tregjeve

Sekretariati i Komunitetit të Energjisë e konsideron si hap pozitiv nisjen e operimeve të Bursës Shqiptare të Energjisë Elektrike, ALPEX por thekson se sfidë mbetet sigurimi i një tregu likuid dhe përdorimi nga operatorët publikë dhe privatë.  Sipas Sekretariatit, zhvillimi i tregut të ditës në avancë është një moment i rëndësishëm drejt avancimit të tregjeve të energjisë elektrike në vend dhe sigurimit të një sinjali transparent çmimesh për investimet në energjinë e rinovueshme.

Por, thelbësor për rritjen e lukiditetit, sipas është nisja e operimeve Brenda së njëjtës ditë dhe bashkimi i tregut me Kosovën. Ndërkaq, gjatë një takimi të zhvilluar me kreun e Entit Rregullator të Energjisë, Petrit Ahmeti zëvendësdrejtori i Sekretariatit, z. Dirk Buschle, theksoi rëndësinë që ka ERE jo vetëm në përmbushjen e sfidave të mësipërme, por edhe në integrimin e Shqipërisë në tregjet evropiane të energjisë.

Ndërkohë që, kreu i ERE Ahmeti theksoi angazhimin dhe vendosmerinë e institucionit për përballimin e sfidave që dalin përpara si rezultat i zhvillimeve në sektor. Bursa Shqiptare  e Energjisë Elektrike është e dyta në Ballkanin Perëndimor, ndërkohë që aktualisht janë anëtarësuar vetëm kompanitë publike të energjisë e më konkretisht, 3 kompanitë e OSHEE Group, OST dhe KESH. Ndërkaq, edhe ekspertët  në Shqipëri e kanë konsideruar si të paplotë operimin eALPEX, vetëm me pjesëmarrjen e kompanive publike të energjisë, pa përfshirë operatorët privatë.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.