Bursat e nisin javën në rritje – Investitorët, të fokusuar te fitimet tremujore të korporatave
Tregjet europiane po qëndrojnë në rritje në sesionin e sotëm, ndërsa investitorët janë të fokusuar te fitimet tremujore të korporatave, që mund të japin një panoramë më të qartë mbi gjendjen e ekonomisë amerikane.
Indeksi pan-Europian Stoxx 600 e ka nisur ditën në rritje me 0.2%, ndërsa shumica e sektorëve janë në territor pozitiv. Sektori minerar realizon fitimet më të mëdha, në rritje me rreth 1%. Investitorët po presin të mësojnë më tepër në lidhje me shëndetin e sektorit bankar, pas kolapsit të disa institucioneve financiare muajin e kaluar në Shtetet e Bashkuara, pas problemeve me likuiditetin.
Ndërkohë, guvernatori i Bankës së Finlandës, Olli Rehn, njëkohësisht anëtar i Bankës Qendrore Europiane, deklaroi për CNBC se normat e interesit do të arrijnë majën në verë dhe më pas, në varësi të ecurisë së çmimeve mund të fillojë tendenca në rënie. Investitorët po presin edhe të dhënat mbi Prodhimin e Brendshëm Bruto në Kinë dhe në Gjermani, që do të publikohen më vonë gjatë kësaj jave.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.