Bursat europiane i rikthehen fitimeve – Rriten me mbi 1.5%, pavarësisht tensioneve gjeopolitike

Bursat europiane janë rritur ndjeshëm në sesionin e sotëm, pavarësisht krizës gjeopolitike dhe gjakderdhjes në Izrael dhe Gaza. Indeksi pan-Europian Stoxx 600 po qëndron në rritje me rreth 1.5%, ndërsa të gjithë sektorët janë në territor pozitiv. Sektori i udhëtimeve realizon fitimet më të mëdha, në rritje me 2.15%, pavarësisht paqartësive pasi kompanitë kanë anuluar fluturimet drejt Izraelit.

Forcat izraelite bombarduan Rripin e Gazës me sulme ajrore të hënën, ndërsa vijon kundërpërgjigjja ndaj sulmit të befasishëm nga grupi militant palestinez Hamas, që filloi të shtunën në mëngjes.

Ministrat izraelitë kanë urdhëruar një “rrethim të plotë” të Rripit të Gazës, tashmë të bllokuar dhe të varfër, duke ndërprerë furnizimet me ushqim, ujë dhe energji elektrike për rreth dy milionë banorë.

Edhe shumica e tregjeve aziatike u rritën ndjeshëm në sesionin e sotëm. Investitorët e kanë mirëpritur edhe komentet e zyrtarëve të Rezervës Federale, të cilët kanë sinjalizuar një tërheqje nga rritja e normave të interesit.

Zëvendëskryetari i Fed, Philip Jefferson tha se banka qendrore duhet të “vazhdojë me kujdes” duke pasur parasysh rritjen e mprehtë të fundit të yield-eve të obligacioneve. Ndërkohë, presidentja e rezervës Federale të Dallasit, Lorie Logan tha se normat afatgjata të interesit mund të mbeten të larta, që do të thotë më pak nevojë për të rritur normën e fondeve federale.

Lidion Kulla / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.