Bursat europiane, me ndryshime minimale – Mbizotëron shqetësimi për një recesion global, pritet punësimi në SHBA

Bursat europiane janë hapur me ndryshime të vogla edhe në sesionin e sotëm, pasi investitorët po përllogarisin nëse ekonomia globale mund të shkojë drejt recesionit. Indeksi pan-Europian Stoxx 600 e ka nisur ditën në rritje me 0.1%, ndërsa sektori minerar kryeson fitimet, në rritje me rreth 1.1%.

Të dhënat e publikuara në SHBA, sugjerojnë se ekonomia më e madhe në botë po ngadalësohet, duke dobësuar edhe besimin e investitorëve. Kujdesi është i lartë sepse investitorët po presin të dhënat mbi punësimin në SHBA, që do të publikohen të premten, për të pasur një ide më të qartë mbi hapat që do të ndjekë Rezerva Federale.

Edhe shumica e tregjeve në rajonin e Azi-Paqësorit patën një tendencë në rënie. Në këtë situatë, aseti që përfiton më shumë është ari, i cili po tregtohet në mbi 2 mijë dollarë për të tretin sesion me radhë dhe po qëndron pranë nivelit më të lartë në thuajse 3 vite.

Në fokus të tregjeve janë edhe zhvillimet që kanë të bëjnë me sektorin bankar në SHBA dhe në Europë, sepse disa investitorë kanë paralajmëruar se kriza nuk ka përfunduar ende.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.