Bursat europiane, të kujdesshme – Investitorët presin fitimet e korporatave dhe zhvillimet në Lindjen e Mesme
Tregjet europiane po karakterizohen nga një volum i ulët tregtar në sesionin e sotëm, për shkak se investitorët po presin fitimet tremujore të korporatave dhe janë të fokusuar te zhvillimet që kanë të bëjnë me Lindjen e Mesme. Indeksi pan-Europian Stoxx 600 po qëndron në rritje të lehtë me 0.2%, ndërsa sektori i lëndëve të para kryeson humbjet, në rënie me 1.7%.
Ndërkohë, shumica e tregjeve në rajonin e Azi-Paqësorit patën një tendencë në rritje, ndërsa kontratat “futurës” në Wall Street po qëndrojnë në rënie të lehtë. Gjatë ditës së sotme do të publikojnë fitimet e tyre tremujore kompanitë europiane, si Ericsson, Rio Tinto dhe Publicis dhe gjigantët amerikanë, si Bank of America dhe Goldman Sachs.
Investitorët në të gjithë botën, po monitorojnë nga afër zhvillimet në Gaza, pasi presidenti amerikan, Joe Biden do të vizitojë Izraelin të Mërkurën, ndërsa Sekretari amerikan i Shtetit, Antony Blinken, tha se rreth 2000 trupa po përgatiten për tu vendosur në Lindjen e Mesme.
Përsa i përket zhvillimeve të tjera, fitimet e punonjësve britanikë u rritën mesatarisht me 7.8%, duke përjashtuar bonuset, gjatë periudhës qershor-gusht të këtij viti, krahasuar me një vit më parë. Rritja vjetore e pagave është një ndër matësit kryesorë të presioneve inflacioniste.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.