Bursat europiane, të qëndrueshme – Volum i ulët i shkëmbimeve tregtare pasi Wall Street është pushim
Bursat europiane po ndryshojnë minimalisht edhe në sesionin e sotëm, ndërsa investitorët po e cilësojnë si një sesion pauzë, edhe për shkak se Wall Street do të qëndrojë pushim me rastin e Ditës së Falenderimeve. Indeksi pan-Europian Stoxx 600 e ka nisur ditën në rënie me rreth 0.1%, ndërsa sektori i shitjeve me pakicë realizon humbjet më të mëdha në rënie me rreth 0.8%.
Procesverbali i takimit të fundit i Rezervës Federale sinjalizoi se rritja e interesave ka dhënë efekt në ngadalësimin e inflacionit dhe për këtë arsye mund të ngadalësohet hapi i rritjes në të ardhmen. Investitorët europianë kanë reaguar edhe ndaj disa të dhënave ekonomike në Eurozonë, që sugjerojnë se recesioni mund të jetë më i cekët se parashikimet fillestare.
Besimi i sektorit industrial në Gjermani shënoi një përmirësim surprizë, gjatë nëntorit, kundrejt parashikimeve të analistëve për një ngadalësim të mëtejshëm. Edhe shumica e tregjeve aziatike u mbyllën në rënie të lehtë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.