Central eolik 120 MW në Pogradec – Energjia e erës / Interes nga investitorët privatë, nuk përfiton nga masat mbështetëse

Teksa interesi për centrale diellore ka qenë në rritje vitet e fundit, investitorët po hedhin sytë edhe nga energjia e erës. Pranë Ministrisë së Infrastrukturës dhe Energjisë ka mbërritur aplikimi për ndërtimin e një impianti eolik të madh, me kapacitet të instaluar 120 MW.

Sipas interesit të shprehur nga shoqëria “Renx Albania” centrali parashikohet të ndërtohet në zonën e Bashkisë Pogradec.  Ndërkohë që, në rast të miratimit shoqëria nuk do të përfitojë nga masat mbështetëse të qeverisë.

Gjatë viteve të fundit ka patur disa shoqëri që kanë shprehur interes për energjinë e erës, por përgjithësisht aplikimet e tyre kanë qenë për centrale të vegjël deri në 3 MW.

Ndërkaq, në korrik të vitit që shkoi Ministria e Infrastrukturës dhe Energjisë shpalli projektet fituese të Ankandit për Parqe Eolike, duke kualifikuar 3 kompani, teksa kapaciteti total i tyre ishte 222.48 MW.

Sipas procedurës, fituesit lidhin një Marrëveshje për Zhvillimin e Projektit dhe një Kontratë për Diferencë për të shitur 100% të prodhimit të energjisë me çmim fiks, të barabartë me ofertën financiare në procedurën konkurruese.

Aktualisht, në vendin tonë nuk ka asnjë impiant të prodhimit të energjisë nga era, ndërkohë që nevoja për diversifikimin e burimeve të prodhimit të energjisë është e madhe, për shkak të varësisë nga kushtet hidrike.

Sipas të dhënave nga Enti Rregullator i Energjisë, aktualisht janë vetëm 2 kompani të licencuara në prodhimin e energjisë elektrike nga era, por impiantet nuk kanë hyrë ende në prodhim.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.