Cilat janë sfidat për rritjen e eksporteve bujqësore? – Denaj: Fuqizim i prodhuesve për të arritur standardet e tregjeve europiane

Prodhuesit e vegjël dhe të mesëm në vend po asistohen që të rrisin cilësinë edhe standardet e produkteve të tyre, në mënyrë që të aksesojnë tregjet europiane dhe me gjerë, si dhe të shmangin refuzimet në kufi.

Forumi i parë për Cilësi dhe Standarde, ka vënë theksin tek ndihma që po jep në këtë drejtim Programi Global i Cilësisë dhe Standardeve (GQSP) i zbatuar nga Organizata e Kombeve të Bashkuara për Zhvillim Industrial (UNIDO) dhe që financohet nga qeveria zvicerane,  tashmë i shtrirë edhe në Shqipëri dhe se si duhet përdorur më shumë inovacioni.

Ambasadorja e Zvicrës në Tiranë dhe përfaqësuesja e OKB-së, theksuan domosdoshmërinë e prodhuesve shqiptarë për të qenë më konkurrues përmes rritjes së cilësisë dhe standardeve të produkteve.

Ndërsa Ministrja e Bujqësisë, Anila Denaj bëri me dije se ky program asiston në dy drejtimet më me potencial për eksportet shqiptare siç janë fruta-perimet dhe bimët mjekësore.

Mbi 150 pjesëmarrës që përfaqësojnë qeverinë, ndërmarrjet e vogla dhe të mesme, politikëbërësit, ekspertët, institucionet e Infrastrukturës së Cilësisë, autoritetet e sigurisë ushqimore, konsumatorët, fermerët, prodhuesit diskutuan mbi sfidat me të cilat përballet sektori bujqësor dhe rritjen e potencialit të prodhuesve të vegjël duke promovuar cilësinë, standardet, digjitalizimin dhe inovacionin.

Elisabeta Dosku / SCAN

 

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.