Çmimet e larta të ushqimeve në Europë – Inflacioni i lartë, presion ndaj familjeve dhe klasës politike
Europianët përballen tashmë prej kohësh me cmimet e larta të produkteve ushimore bazë. Për shembull në Britaninë e Madhe, buka e bardhë e prerë në feta nuk mungon në asnjë tryezë dhe cmimi mesatar i saj ishte 28% më i lartë në prill, në krahasim me të njëjtën periudhë një vit më parë.
Në Itali, çmimi i spagetit dhe makaronave të tjera, të cilat janë baza e dietës italiane, u rrit me gati 17% krahasuar me një vit më parë. Në Gjermani, ekonomia më e madhe e Bashkimit Europian, çmimet e djathit janë pothuajse 40% më të larta se një vit më parë dhe patatet tani kushtojnë 14% më shumë.
Në të gjithë Bashkimin Europian , çmimet e ushqimeve ishin mesatarisht 17% më të larta në prill 2023 sesa në prill 2022. Situata në Britani është më e keqe se në fqinjët e saj të Europës Perëndimore: ushqimet dhe pijet joalkoolike ishin 19% më të larta në prill se një vit më parë – ndërsa norma e inflacionit vjetor ishte më e larta në më shumë se 45 vjet. Për krahasim, inflacioni përkatës në SHBA ishte 7.7%.
Inflacioni i vazhdueshëm po ushtron presion ndaj familjeve me të ardhura të ulëta dhe po shqetëson politikanët europianë. Në Itali, qeveria mbajti një takim këtë muaj për të diskutuar rritjen e çmimeve të makaronave.
Në të njëjtën kohë, kostot bazë të prodhimit të ushqimit, duke përfshirë grurin dhe produktet e tjera bujqësore, si dhe karburantin, kanë rënë në tregjet ndërkombëtare – duke ngritur pyetje se pse çmimet e ushqimeve mbeten kaq të larta për konsumatorët në Europë.
Pas çmimit të një buke, përfshihen ndër të tjera kostot e paketimit, transportit dhe pagave. Indeksi i Kombeve të Bashkuara i çmimeve botërore për produktet kryesore ushqimore si gruri dhe mishi arriti kulmin në mars të vitit 2022, menjëherë pasi Rusia pushtoi Ukrainën, e cila është një nga prodhuesit më të mëdhenj të drithërave. Përveç çmimeve të mallrave, Europa regjistroi rritje të kostove përgjatë zinxhirit të furnizimit me ushqime. Megjithëse çmimet e energjisë me shumicë kanë rënë kohët e fundit, shitësit me pakicë paralajmërojnë se ka një vonesë të gjatë – ndoshta deri në një vit – përpara se konsumatorët të shohin përfitimet.
Në të njëjtën kohë, vendet e lira të punës po i detyrojnë punëdhënësit dhe kompanitë ushqimore të rrisin pagat për të tërhequr punëtorë. Kjo, nga ana tjetër, rrit kostot për bizneset, përfshirë sektorin e ushqimit.
Në të gjithë kontinentin, qeveritë po ndërhyjnë duke vendosur kufij të çmimeve për ushqimet kryesore. Në Francë, qeveria po promovon një “tremujor anti-inflacioni”, duke u kërkuar shitësve të ulin çmimet për produkte të caktuara deri në qershor.
Këto përpjekje mund të ndihmojnë disa blerës, por në përgjithësi nuk ka shumë për të ngushëlluar europianët. Çmimet e ushqimeve nuk kanë gjasa të bien – e vetmja gjë që ka gjasa është që ritmi i rritjes të ngadalësohet më vonë këtë vit.
Dorina kurtaj / SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.