Copernicus: Bota thyen rekordin e temperaturës mesatare për fillimin e qershorit

Temperaturat mesatare globale në fillim të qershorit ishin më të ngrohtat që njësia e monitorimit të klimës së Bashkimit Evropian ka regjistruar ndonjëherë për periudhën, duke mposhtur rekordet e mëparshme me një “diferencë të konsiderueshme”.

Lajmi vjen pasi fenomeni klimatik El Nino ka mbërritur zyrtarisht, duke rritur frikën për motin ekstrem dhe më shumë rekorde të temperaturës.

“Bota sapo ka përjetuar fillimin e qershorit më të ngrohtë në histori, pas një muaji maj që ishte më pak se 0,1 gradë Celsius më i ftohtë se maji më i ngrohtë i regjistruar”, tha Samantha Burgess, zëvendës drejtore e Shërbimit të Ndryshimeve Klimatike të Copernicus (C3S).

“Temperaturat mesatare globale të ajrit në sipërfaqe për ditët e para të qershorit 2023 ishin më të lartat në rekordin e të dhënave ERA5 për fillim të qershorit me një diferencë të konsiderueshme,” tha Copernicus. Disa nga të dhënat e njësisë shkojnë deri në vitin 1950.

Koperniku njoftoi kohët e fundit se oqeanet globale ishin më të ngrohta muajin e kaluar se në çdo maj tjetër të regjistruar.

Njësia tha se më 8 dhe 9 qershor të këtij viti, temperatura mesatare ditore globale ishte rreth 0.4C më e ngrohtë se rekordet e mëparshme për të njëjtat ditë.

Ai tha gjithashtu se në fillim të qershorit, temperaturat globale tejkaluan nivelet para-industriale me më shumë se 1.5C, që është kufiri më ambicioz për ngrohjen globale në Marrëveshjen e Parisit të vitit 2015.

Sipas të dhënave, temperatura mesatare ditore globale ishte në ose mbi pragun 1,5 gradë Celsius në periudhën 7-11 qershor, duke arritur një maksimum prej 1,69 gradë Celsius mbi të më 9 qershor.

“Çdo thyesë ka rëndësi”

Ndërsa është hera e parë që shkelet kufiri në qershor, ky kufi është tejkaluar disa herë në dimër dhe pranverë vitet e fundit.

“Çdo pjesë e një shkalle ka rëndësi për të shmangur pasojat edhe më të rënda të krizës klimatike,” tha Burgess.

El Nino, që do të thotë “Djalë i vogël” në spanjisht, karakterizohet nga temperatura më të ngrohta se mesatarja e sipërfaqes së detit në Oqeanin Paqësor qendror dhe lindor pranë ekuatorit.

Modeli i motit ka ndodhur për herë të fundit në 2018-19 dhe zhvillohet mesatarisht çdo 2-7 vjet.

Shumica e viteve më të ngrohta të regjistruara kanë ardhur gjatë El Ninos dhe shkencëtarët janë të shqetësuar se këtë verë dhe në vijim mund të shohin temperatura rekord në tokë dhe në det.

“Ndërsa El Nino aktual vazhdon të zhvillohet, ka arsye të mirë për të pritur periudha në 12 muajt e ardhshëm, gjatë të cilave temperatura mesatare e ajrit tejkalon përsëri nivelet para-industriale me më shumë se 1.5C,” tha Copernicus.

Njësia e monitorimit është e vendosur në qytetin gjerman të Bonit, ku po zhvillohen bisedimet e OKB-së për klimën përpara samitit të klimës COP28 që do të mbahet në Dubai në fund të vitit.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.