Devijon rruga në hyrje të Tiranës – ARRSH: Punime për të realizuar rampën lidhëse në Unazën Lindore

Qarkullimi i automjeteve në aksin kryesor të hyrjes në Tiranë nga Elbasani do të devijojë.  Autoriteti Rrugor Shqiptar njofton se duke filluar nga data 27.03.2024 do të kryejë punimet në rrugën qe lidh Unazën Lindore me rrethrrotullimin e TEG ku do të bëjë devijimin e trafikut sipas planit të menaxhimit të trafikut, për të realizuar rampën lidhëse Unaza Lindore në drejtim të Tiranës.

Sipas Autoritetit Rrugor Shqiptar, pas përfundimit të rampës lidhëse, rruga që vjen nga Sauku për në nyjen TEG mbyllet, duke shërbyer vetëm për bizneset e zonës.

Autoritetit Rrugor Shqiptar bën me dije se menaxhimi i trafikut do kryhet sipas Planit të Menaxhimit të Trafikut. Kontraktori i punimeve në bashkëpunim me ARRSH dhe Policinë Rrugore kanë marrë të gjitha masat për menaxhimin e trafikut.

ARRSH ka kërkuar mirëkuptimin e drejtuesve të mjeteve dhe banorëve të zonës për këtë devijim.

Elisabeta Dosku/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.