Dollari amerikan ndal fitimet – Rriten aplikimet për përfitimin e asistencës së papunësisë në SHBA
Dollari amerikan ka ndalur fitimet gjatë sesionit të sotëm, pas publikimit të të dhënave mbi aplikimin e asistencës së papunësisë në SHBA që treguan një rritje gjatë javës së kaluar. Ky raport ka vënë në dyshim komentet e shefit të Rezervës Federale, Jerome Powell, për rritjen e interesave. Investitorët kanë qenë në pritje edhe të vendimmarrjes së Bankës së Japonisë, në takimin e fundi për guvernatorin, Haruhiko Kuroda, mandati i të cilit përfundon në muajin prill.
Banka e Japonisë pritet të mbajë të pandryshuar politikën monetare ultra-lehtësuese. Euro po tregtohet në rreth 1.058 dollarë, ndërsa paundi britanik po këmbehet në rreth 1.193 dollarë. Të dhënat e publikuara në SHBA, treguan se numri i amerikanëve që aplikuan për përfitimin e asistencës së papunësisë u rrit me hapin më të shpejtë në 5 muajt e fundit, gjatë javës së kaluar. Megjithatë, investitorët po presin të dhënat mbi punësimin në SHBA, për shkurtin, që do të publikohen më vonë gjatë ditës së sotme.
Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 105, ndërsa gjatë kësaj jave pritet të publikojë fitime prej rreth 0.6%. Në tregun e kriptomonedhave, bitcoin ka rënë ndjeshëm, duke zbritur poshtë 20 mijë dollarëve, ndërsa ethereum po tregtohet në rreth 1410 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.