Nafta zbret pranë 81 USD për fuçi – Investitorët, të shqetësuar për ngadalësimin e kërkesës
Nafta po qëndron në rënie edhe në sesionin e sotëm, pasi investitorët janë të shqetësuar për ngadalësimin e ekonomisë amerikane, si pasojë e rritjes së interesave. Në këtë mënyrë, tregu i energjisë po qëndron në rënie për të tretin sesion me radhë. Nafta Brent e Londrës po tregtohet në rreth 81 dollarë për fuçi, ndërsa gjatë kësaj jave ka rënë me rreth 5%. Nafta Bruto amerikane po tregtohet në rreth 75 dollarë për fuçi dhe pritet të publikojë humbje javore prej rreth 6%.
Çmimet janë gjendur nën presion edhe nga të dhënat mbi aplikimin e asistencës së papunësisë në SHBA, që u rritën me hapin më të shpejtë në 5 muajt e fundit, gjatë javës së kaluar. Pritshmëritë për rritjen e normave të interesit në SHBA dhe komentet e bëra nga presidentja e Bankës Qendrore Europiane, Christine Lagarde për ngadalësimin e ekonomisë së Eurozonës kanë ushtruar presion mbi çmimet.
Një panoramë më të qartë mbi gjendjen e ekonomisë amerikane do ta japë raporti mbi punësimin për shkurtin, që do të publikohet më vonë gjatë ditës së sotme. Analistët parashikojnë se, ekonomia më e madhe në botë do të ketë krijuar edhe 205 mijë vende të reja pune, gjatë muajit të kaluar.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.