Dollari e nis javën në rënie – Investitorët presin të dhënat mbi inflacionin në SHBA

Dollari amerikan po qëndron në rënie edhe në sesionin e sotëm, duke zgjeruar humbjet e javës së kaluar, për shkak se investitorët besojnë që Rezerva Federale mund të jetë drejt ciklit të rritje së interesave. Tregjet po presin të dhënat mbi inflacionin në SHBA, që do të publikohen ditën e mërkurë dhe huadhënien bankare.

Paundi britanik po tregtohet në mbi 1.26 dollarë, niveli më i lartë në 12 muajt e fundit, pasi Banka e Anglisë pritet të rrisë normën bazë të interesit me 25 pikë bazë, në takimin e së enjtes. Në anën tjetër, euro që ka fituar mbi 16% që vlerës që nga shatori i kaluar, po tregtohet në mbi 1.1 dollarë, por po dështon të thyejë nivelin e resiztencës, prej 1.11  dollarë. Javën e kaluar, Rezerva Federale dhe Banka Qendrore Europiane e rritën normën bazë të interesit edhe me 25 pikë bazë, por ofruan parashikime të ndryshme në lidhje me të ardhmen e politikave monetare.

Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në mbi 101, por javën e kaluar humbi rreth 0.4% të vlerës. Edhe tregu i kriptomonedhave e ka nisur këtë javë në rënie, me bitcoin që po tregtohet në rreth 28 mijë dollarë, ndërsa ethereum po tregtohet në rreth 1860 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.