Dollari, në nivelin më të lartë në 1 javë – FED pritet ta ulë normën bazë me 125 pikë në vitin 2024
Dollari amerikan po qëndron në rritje të lehtë edhe në sesionin e sotëm, pranë nivelit më të lartë në 1 javë, duke zgjeruar fitimet e sesionit të kaluar. Në anën tjetër, euro po qëndron pranë nivelit më të ulët në 3 javët e fundit dhe po tregtohet në rreth 1.084 dollarë.
Analistët shprehen se forcimi i dollarit amerikan është ndikuar, pasi investitorët përfituan nga çmimi i ulët i monedhës së gjelbër, sepse gjatë nëntorit ra me rreth 3%, humbjet më të mëdha mujore në thuajse 1 vit.
Investitorët po presin edhe një sërë treguesish ekonomikë që do të publikohen në SHBA dhe mund të japin një panoramë më të qartë mbi të ardhmen e normave të interesit. Të premten do të publikohet raporti mbi punësimin në SHBA për nëntorin, i cili mund të ketë ndikim në ecurinë e dollarit.
Edhe paundi britanik po këmbehet i qëndrueshëm, në rreth 1.2640 dollarë. Ndër zhvillimet e tjera, anëtarja e Bankës Qendrore Evropiane, Isabel Schnabel, deklaroi në një intervistë për Reuters se rritja e mëtejshme e normave të interesit ishte jashtë diskutimeve, duke pasur parasysh rënien e jashtëzakonshme të inflacionit.
Një muaj më parë, Schnabel insistonte që normat e interesit duhej të rriteshin më tej. Që nga java e kaluar, kur u publikuan të dhënat mbi inflacionin në Eurozonë, euro ka humbur rreth 1.4% të vlerës. Ndërkohë, tregtarët vlerësojë një ulje të normës bazë të interesit në SHBA me të paktën 125 pikë bazë, gjatë vitit të ardhshëm.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.