Tensionet gjeopolitike mbështesin naftën – Fitimet kufizohen nga shqetësimet për ngadalësimin e kërkesës

Çmimet e naftës i janë rikthyer fitimeve në sesionin e sotëm, për shkak të paqartësive mbi uljen vullnetare të prodhimit nga OPEC+ dhe tensioneve në Lindjen e Mesme, që mund të çrregullojnë furnizimin e tregut. Në dy sesionet e fundit, ndërkohë, çmimet e naftës kanë humbur mbi 3% të vlerës.

Nafta Brent e Londrës po tregtohet në mbi 78 dollarë për fuçi, ndërsa nafta Bruto amerikane po tregtohet në rreth 73 dollarë për fuçi. Çmimet e naftës realizuan humbje të konsiderueshme në sesionet e kaluara, pasi investitorët kishin dyshime se tkurrja e ofertës nga OPEC+ nuk do të kishte një ndikim të rëndësishëm në treg.

Edhe forcimi i dollarit amerikan në sesionin e kaluar, ndikoi në rënien e çmimeve. Një dollar më i fortë zakonisht e bën naftën më të shtrenjtë për zotëruesit e monedhave të tjera, që mund të zvogëlojë kërkesën për naftë.

Organizata e Vendeve Eksportuese të Naftës dhe aleatët e tjerë duke përfshirë Rusinë, që njihen si OPEC+, ranë dakord të enjten për shkurtime vullnetare të prodhimit në një total prej rreth 2.2 milionë fuçi në ditë, për tremujorin e parë të vitit 2024. Por, të paktën 1.3 milionë fuçi në ditë nga këto shkurtime, ishin një zgjatje e kufizimeve vullnetare që Arabia Saudite dhe Rusia kishin ndërmarrë përgjatë vitit 2023.

Ministri saudit i Energjisë, Princi Abdulaziz bin Salman, deklaroi në një intervistë për Bloomberg se shkurtimet e prodhimit të naftës nga OPEC+ mund të vazhdojnë edhe përtej tremujorit të parë 2024, nëse do të jetë e nevojshme.

Edhe rifillimi i luftimeve mes Izraelit dhe Hamas, ka rikthyer shqetësimet për furnizimin e tregut. Ushtria amerikane njoftoi të dielën se 3 anije tregtare u sulmuan në ujërat ndërkombëtare të Detit të Kuq, ndërsa grupi Houthi që operon në Jemen, mori përsipër sulmet me dronë dhe raketa.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.