Ari i largohet nivelit rekord prej 2,100 USD – Investitorët po presin të dhënat mbi punësimin në SHBA

Ari po tregtohet i qëndrueshëm në sesionin e sotëm, por i është larguar nivelit rekord prej 2,100 dollarë të regjistruar në sesionin e kaluar, ndërsa investitorët po presin disa të dhëna ekonomike në SHBA, të cilat do ta qartësojnë më shumë rrugën e normave të interesit.

Kontrata “spot” e arit po tregtohet në rreth 2,040 dollarë për onz, ndërsa në sesionin e kaluar preku nivelin më të lartë në histori prej 2,135 dollarë, përpara se të humbje rreth 100 dollarë në vijim, për ta mbyllur ditën në rënie me 2%. Analistët parashikojnë se Rezerva Federale në SHBA do ta ulë normën bazë të interesit me 125 pikë bazë, gjatë vitit 2024.

Këto pritshmëri mund të ndikojnë që ari të tregtohet në mbi 2,000 dollarë për onz, në terma afatshkurtër. Tregjet po presin të dhënat mbi punësimin në SHBA, që do të publikohet të premten dhe do të japin një panoramë më të qartë mbi tregun e punës.

Çmimet e metalit të verdhë janë rritur për dy muaj radhazi, pasi konflikti izraelito-palestinez ka rritur kërkesën për asetet e sigurta, ndërsa pritshmëritë për një ulje të normave të interesit kanë dhënë mbështetje të mëtejshme. Ari tenton të performojë mirë gjatë periudhave të pasigurive ekonomike dhe gjeopolitike.

Analistët presin një çmim mesatar të arit në rreth 2100 edhe gjatë tremujorit të dytë të vitit 2024, për shkak të blerjeve të forta nga bankat qendrore. Ndërkohë, normat e larta të interesit e dëmtojnë kërkesën për ar, i cili nuk paguan asnjë interes, pasi asetet e tjera siç janë obligacionet bëhen më fitimprurëse për shkak të yield-eve të larta.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.