Dollari, në nivelin më të lartë në 1 javë – FED rrit normën bazë të interesit në 4%, priten rritje të tjera në vijim

Dollari amerikan po qëndron në rritje në sesionin e sotëm, pasi presidenti i Rezervës Federale, Jerome Powell, sinjalizoi se normat e interesit do të rriten më shpejt se parashikimet, duke zhgënjyer investitorët që prisnin një ngadalësim të hapit në rritjes. Për rrjedhojë, euro ka humbur rreth 0.4% të vlerës përballë dollarit amerikan, duke zbritur poshtë 0.98 dollarëve.

Rezerva Federale rriti normën bazë të interesit me 75 pikë bazë në intervalin nga 3.75-4%, sikurse pritej gjerësisht nga analistët. Edhe paundi pritanik ka humbur rreth 0.8% të vlerës përballë dollarit, duke zbritur poshtë 1.14. Tashmë, investitorët po presin vendimet e Bankës së Anglisë më vonë gjatë ditës së sotme, ku gjithashtu parashikohet që norma bazë e interesit të rritet me 75 pikë bazë, që do të jetë rritja më e madhe që nga viti 1989.

Indeksi që mat ecurinë e dollarit amerikan, përballë gjashtë monedhave kryesore ndërkombëtare, po qëndron në rreth 112, niveli më i lartë në 1 javë. Në tregun e kriptomonedhave, bitcoin po tregtohet në rreth 20,300 dollarë, ndërsa ethereum po tregtohet në rreth 1540 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.