Dollari, në nivelin më të ulët në 2 muaj – Investitorët presin raportin mbi punësimin në SHBA për marsin
Tregu i monedhave po shfaqet i qëndrueshëm edhe në sesionin e fundit të kësaj jave, pasi investitorët po presin të dhënat mbi punësimin në SHBA, që publikohen më vonë gjatë ditës së sotme. Megjithatë, volumi i shkëmbimeve tregtare pritet të jetë i ulët pasi Wall Street do të qëndrojë pushim, me rastin e së Premtes së Mirë në SHBA.
Edhe disa tregje europiane do të jenë pushim të Hënën, me rastin e Pashkëve. Raporti mbi punësimin për marsin do të publikohet më vonë gjatë ditës së sotme, por efekti në treg do të jetë minimal, sepse shumica e tyre do të jenë pushim.
Analistët parashikojnë se, ekonomia amerikane do të ketë krijuar edhe 239 mijë vende të reja pune, gjatë muajit të kaluar, nga 311 mijë që krijoi në shkurt. Indeksi që mat ecurinë e dollarit amerikan, përballë shportës me 6 monedhat kryesore ndërkombëtare po qëndron në rreth 101.8, shumë pranë nivelit më të ulët në 2 muajt e fundit.
Referuar të dhënave të tjera në SHBA, aplikimet për përfitimin e asistencës së papunësisë ra me 18 mijë njësi, në totalin e 228 mijë aplikimeve, gjatë javës që u mbyll më 1 prill. Në tregun e kriptomonedhave, bitcoin vijon të tregtohet pranë 28 mijë dollarëve, ndërsa ethereum po tregtohet në rreth 1870 dollarë.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.