Dollari, në nivelin më të ulët në 6 muaj – Shtohen shenjat që konfirmojnë ngadalësimin e ekonomisë amerikane

Dollari po qëndron në rënie të lehtë edhe në sesionin e sotëm, për shkak të shenjave se ekonomia amerikane mund të shkojë drejt recesionit gjatë vitit 2023. Megjithatë, investitorët po presin takimin e Rezervës Federale dhe të dhënat mbi inflacionin javën e ardhshme. Euro ka fituar rreth 0.5% të vlerës në sesionin e kaluar, përballë monedhës së gjelbër dhe po tregtohet në rreth 1.0570 dollarë, niveli më i lartë në 6 muajt e fundit.

Edhe paundi po qëndron në mbi 1.22 dollarë, gjithashtu niveli më i lartë në 6 muajt e fundit. Referuar të dhënave në SHBA, aplikimet për përfitimin e asistencës së papunësisë u rritën lehtë gjatë javës së kaluar, duke shtuar mundësitë që ekonomia më e madhe në botë të shkojë drejt recesionit. Indeksi që mat ecurinë e dollarit amerikan përballë shportës me 6 monedhat kryesore ndërkombëtare po qëndron në rreth 104.7 dhe pritet të realizojë humbjet më të mëdha tremujore që nga viti 2010. Menaxherët e parave vlerësojnë 93% mundësi që Rezerva Federale të rrisë me 50 pikë bazë, normën e interesit në takimin e javës së ardhshme.

Gjithashtu, edhe Banka Qendrore Europiane dhe Banka e Anglisë do të njoftojë vendimet e politikave monetare javën që vjen, por do të bëjnë edhe një përditësim të parashikimin për ecurinë e ekonomisë, gjatë vitit 2023. Në tregun e kriptomonedhave, bitcoin është rritur ndjeshëm dhe po tregtohet në rreth 17,200 dollarë, ndërsa ethereum po tregtohet në rreth 1280 dollarë.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.