Ekonomia e Shqipërisë, rritje 2,5% këtë vit – BERZH lë të pandryshuar parashikimin. Sektori i turizmin jep kontributin kryesor

Banka Europiane për Rindërtim dhe Zhvillim (BERZH) në publikimin e saj më të fundit ka lënë ta pandryshuar, ashtu si në publikimin e majit, rritjen e ekonomisë së Shqipërisë për këtë vit në 2,5%. Në një analizë të shkurtër për vendin tonë, BERZH thekson se rritja ekonomike qëndroi në nivelin 2.7% në bazë vjetore në tremujorin e parë, ndërsa kërkesa e brendshme u dobësua për shkak të inflacionit të lartë, megjithëse në rënie. Eksportet e mallrave u tkurrën ndjeshëm për shkak të kërkesës së jashtme më të ulët dhe mbiçmimit të fortë të lekut.

Vlera e lekut ishte 12% më e lartë në korrik 2023, në krahasim me një vit më parë, mbështetur nga numri i lartë i turistëve të huaj që hynë në vend, si dhe nga flukset hyrëse të vazhdueshme të remitancave dhe investimeve të huaja direkte. Vlerësimi i monedhës kompensoi një pjesë të goditjes inflacioniste, duke rezultuar në një normë vjetore inflacioni prej 4.2% në korrik 2023, poshtë niveleve të vendeve të tjera të Ballkanit Perëndimor dhe atyre në Eurozonë dhe duke lejuar një normë relativisht të përshtatshme të politikës së Bankës Qendrore prej 3% në fund të gushtit.

Rritja pritet të vazhdojë me një ritëm të moderuar prej 2.5% në vitin 2023, duke pasur parasysh perspektivat e anemike të partnerit kryesor tregtar të Shqipërisë, Italisë dhe inflacionit ende të lartë të ushqimeve. Nga ana tjetër, ecuria jashtëzakonisht e fortë e sektorit të hotelerisë, me ardhjet e turistëve në rritje me 30% në vit në shtatë muajt e parë të 2023, pritet të mbështesë rritjen si në afat të shkurtër, ashtu edhe në atë afatmesëm. Në përputhje me rimëkëmbjen e parashikuar globale, rritja ekonomike parashikohet të kthehet më pranë potencialit të saj, duke arritur në 3.3% në 2024-ën.

Përsa i përket Kosovës, BERZH thekson se ekonomia u zgjerua me një normë prej 3.9% në tremujorin e parë të 2023-shit. Shërbimet po nxitin rritjen në sektorin e prodhimit, pasi flukset hyrëse të diasporës, të llogaritura si pjesë e të ardhurave nga turistët, çuan në një zgjerim dyshifror në sektorët e shitjes me pakicë dhe në atë të turizmit.

BERZH parashikon që Prodhimi i Brendshëm Bruto i Kosovës të arrijë në 3,5% për këtë vit në 4% vitin e ardhshëm, por ekzistojnë rreziqe të situatës së tensionuar në veri të vendit, që ndikojnë negativisht në flukset tregtare dhe besimin e investitorëve.

Dorina Kurtaj/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.