Yieldet e bonove stabilizohen pranë 3% – Interesat e letrave me vlerë të qeverisë, përsëri shumë të ulëta në shtator

Bonot e thesarit me afat maturimi 12-mujor kanë mbetur edhe këtë javë të fundit të shtatorit në nivele shumë të ulëta, fare pranë normës bazë të interesit të Bankës së Shqipërisë prej 3%. Ato janë shitur këtë javë me yieldin 3.15%, i njëjtë me ankandin e mëparshëm për këtë instrument i zhvilluar në fund të gushtit. Normat e interesit kanë shënuar luhatje të papërfillshme që prej mesit të qershorit, kur yeildi mesatar rezultonte 3.29%, duke konfirmuar mungesën e presioneve rritëse dhe krijimin e një stabiliteti të shtrirë në kohë. Në dy ankandet që pasuan, yieldet ranë në nivelin 3.09%, fare pranë normës bazë të interesit të Bankës së Shqipërisë. Që prej asaj periudhe, normat e interesit të instrumenteve 12-mujore janë luhatur mes vlerave 3.13% deri 3.15%.

Ndërkaq, në rritje ka qenë në këtë ankand edhe kërkesa e investitorëve për bono 12 mujore. Shuma e shpallur nga Qeveria ishte 7.2 miliardë lekë, ndërkohë që shuma e vënë në dispozicion nga investitorët ishte thuajse 11 miliardë lekë. Raporti mes shumës së shpallur dhe kërkesës së investitorëve ka ardhur në rritje të lehtë karahasuar me ankandin e mëparshëm, në një kohë që në muajt e verës u vërejt një prani e ulët investitorësh.

Por, megjithë rritjen e pranisë së investitorëve në ankandet e fundit, vëmendja e tyre për letra me vlerë të qeverisë ka ardhur në rënie gjatë këtij viti, gjë që paqsqyrihet qartë edhe te ecuria e depozitave në sistemin bankar. Gjashtëmujori i parë i këtij viti ka forcuar tendencën e individëve e bizneseve drejt depozitave me afate të gjata. Sipas të dhënave zyrtare të Bankës së Shqipërisë, depozitat pa afat shënuan një ngadalësim në 8.4% të normave të rritjes, ndërsa ato me afat vijuan rritjen dyshifrore me 11.1% për gjysmën e parë të vitit. Kontributi tjetër vjen prej një serie paketash që sistemi bankar ka propozuar për depozitat. Në treg gjenden oferta për depozita 1-vjeçare në lek, ndërkohë që ka pasur oferta të ngjashme edhe për depozitat në euro.

Lorenc Rabeta/SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.