Europa arrin të kursejë energji – Falë planifikimit të qeverive, apo thjesht fat?!

Edhe pse Rusia siguronte 40-50% të sasive të gazit natyror të importuar nga Bashkimi Europian deri në vitin 2021, europianët arritën ta kalonin dimrin pa probleme. Mes frikës së mirëfilltë të mungesës, BE-ja gushtin e kaluar vendosi një objektiv për të ulur konsumin e gazit në 27 shtetet e saj anëtare me 15% për dimrin 2022-2023 – i cili së fundmi u shtri në një plan 12-mujor.

Sipas të dhënave të publikuara pak ditë më parë në Bruksel nga instituti prestigjioz Bruegel, BE-ja ia arriti qëllimit dhe më shumë: Nga fillimi i dhjetorit deri në fund të shkurtit, kërkesa për gaz në BE ka shënuar një rënie prej rreth 16 % krahasuar me kërkesën mesatare të tre dimrave të mëparshëm.

Në përgjithësi, kërkesa për gaz natyror në dimër është më shumë se dyfishi i çdo vere. Duke ulur merkurin me një gradë Celsius, qytetari mesatar në Europë rrit konsumin ditor të energjisë me rreth 1.2 kilovatorë në vit, ose 4.6% të mesatares ditore.

The Economist kreu një eksperiment modeli statistikor për të parë nëse ishte dimri apo masat shtrënguese që reduktuan kërkesën për gaz në muajt e fundit në Europë, duke përfshirë 25 vende të BE-së plus Britaninë e Madhe, duke përjashtuar Qipron dhe Maltën që kanë konsum minimal. Modelit iu kërkua të vlerësonte kërkesën për person për çdo muaj dimri nga janari 2013 deri në shkurt 2022.

Pasi modeli mësoi lidhjen midis temperaturave dhe kërkesës për gaz, iu dhanë temperaturat aktuale nga ky dimër dhe iu kërkua të parashikonte se si mund të kishte ecur përdorimi i gazit nëse Rusia nuk do të kishte shkaktuar një krizë energjetike.

Modeli tregoi se vetëm temperaturat shpjegojnë një të tretën e rënies aktuale të kërkesës për gaz këtë dimër. Duke përjashtuar faktorin e motit, europianët reduktuan dhe më shumë përdorimin e gazit natyror me rreth 12%.

Në shifra absolute, Holanda, Britania dhe Gjermania e reduktuan atë më së shumti: përdorimi i gazit natyror për person ishte 24% më i ulët në Holandë, 18% më i ulët në Britani dhe 7% më i ulët në Gjermani, krahasuar me nivelet e parashikuara.

Pjesa më e madhe e kësaj për shkak të rritjes së kostove. Në dhjetor faturat e gazit për familjet evropiane u rritën me 60% krahasuar me një vit më parë, me Britaninë, Gjermaninë dhe Holandën ndër më të goditurat. Kështu, shumë familje dhe biznese reduktuan përdorimin e tyre të energjisë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.