Eurozona, ende në gjendje alarmi – Inflacioni nuk është ulur ndjeshëm

Pas një daljeje dinamike nga pandemia, Europa u godit rëndë nga pasojat ekonomike të pushtimit rus të Ukrainës. Rritja u ngadalësua ndjeshëm dhe inflacioni u rrit. Megjithatë, si rezultat i veprimeve vendimtare të politikave, shumica e ekonomive përfundimisht shmangën recesionin në dimër.

Europa aktualisht përballet me detyrën e vështirë për të mbështetur rimëkëmbjen, për të zbutur inflacionin dhe për të ruajtur stabilitetin financiar. Rritja në ekonomitë e përparuara të Europës do të ngadalësohet në 0.7% këtë vit nga 3.6% vitin e kaluar, ndërsa ekonomitë në zhvillim, duke përjashtuar Turqinë, Bjellorusinë, Rusinë dhe Ukrainën do të kenë gjithashtu një rënie të mprehtë në 1.1%, nga 4.4%. Sipas vlerësimeve më të fundit për rajonin, në këto dy grupe vendesh vitin e ardhshëm do të ketë një rikuperim modest të rritjes përkatësisht në 1.4% dhe 3%, me rritjen reale të pagave dhe kërkesës së jashtme.

Inflacioni vazhdon të zbutet, por inflacioni bazë, duke përjashtuar energjinë dhe ushqimin do të mbetet i qëndrueshëm dhe në mënyrë të pakëndshme mbi objektivin e Bankës Qendrore Europiane edhe në fund të vitit të ardhshëm. Rëniet e fundit dhe të parashikuara të çmimeve të energjisë do të nxisin inflacion më të ulët, duke përjashtuar çmimet e energjisë dhe ushqimeve, por jo aq sa për ta ulur atë shpejt.

Banka Qendrore Europiane dhe autoritetet e tjera monetare do të arrijnë të ulin në mënyrë të qëndrueshme inflacionin. Çdo periudhë e re e stresit financiar do të mbetet e përmbajtur. Nuk do të ketë përshkallëzim të mëtejshëm të luftës së Rusisë në Ukrainë dhe sanksioneve përkatëse, duke mbajtur nën kontroll çmimet e energjisë. Fragmentimi më i gjerë gjeo-ekonomik, një tjetër “stagflacion”, i cili ul rritjen dhe rrit inflacionin, do të mbahet gjithashtu larg.

Megjithatë, gjërat mund të përkeqësohen në të gjitha frontet. Inflacioni, për shembull, mund të mbetet i lartë për më gjatë dhe çmimet e energjisë mund të rriten përsëri. Përballë një pasigurie të tillë, bankat qendrore do të duhet të ruajnë politikën monetare të shtrënguar derisa inflacioni bazë të lëvizë padiskutim në rënie drejt objektivit të BQE-së.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.