Franca do të shesë 190.000 prona për të ulur deficitin – Objektivi: Sigurimi i 5 miliardë eurove për arkën e shtetit

Franca do të shesë 190.000 prona shtetërore në përpjekje për të ulur deficitin. Qëllimi është të futen 5 miliardë euro në arkën e shtetit, në një kohë që deficiti fiskal i vendit shënoi rritje deri në 5.5% të PBB-së.

Qeveria franceze ndodhet përballë lajmit se në vitin 2023 deficiti fiskal i vendit u rrit në 5.5% të PBB-së, shumë më i lartë se vlerësimi fillestar prej 4.4%. Tronditja vjen nga frika se edhe agjencitë ndërkombëtare të vlerësimit do të shqetësohen nga statusi fiskal i Francës dhe do të ulin kreditueshmërinë e saj, duke rritur koston e shërbimit të borxhit tashmë të paimagjinueshëm që arrin në 3 trilionë euro dhe korrespondon me 112% të PBB-së.

Frika është se ekonomia franceze do të përfshihet në një vorbull uljesh të njëpasnjëshme që tentojnë të vazhdojnë deri në rënien përfundimtare të ekonomisë – në falimentim. Për të ecur përpara rishikimeve të ardhshme para fillimit të verës veçanërisht të shtrenjtë për shkak të Olimpiadës, qeveria franceze po nxiton të shpallë masat për të parandaluar kapjen në këtë rreth vicioz. Dhe gjëja e parë që u njoftua të dielën nga ministri për llogaritë publike, ishte përshpejtimi i programit të shitjes së pasurive të paluajtshme të shtetit.

Sipas të dhënave zyrtare në vitin 2023 janë shitur 645 prona shtetërore me një çmim total prej 280 milionë eurosh. Objektivi i rradhës është reduktimi me 25% të hapësirave të zëna nga administrata publike franceze për zyrat. Shteti aktualisht ka rreth 190 mijë ambiente zyrash me një sipërfaqe deri në 100 milionë metra katrorë. Vlera e këtyre pronave ndoshta i kalon 5 miliardë euro.

Natyrisht, jo të gjitha shërbimet publike janë të vendosura në ndërtesa publike. Prioriteti është gjithashtu i kufizimit të hapësirave me qira për këto shërbime. Kjo do të kursente rreth 1 miliard euro në vit në kostot e mirëmbajtjes dhe qirave. Por vitin e kaluar të ardhurat e shtetit nga qiratë e ndërtesave publike u rritën me 20%.

Rastësisht, në një kohë të rënies së çmimeve të pasurive të paluajtshme në Francë  supozohet se rritja e madhe e ofertës së pasurive të paluajtshme komerciale do të përshpejtojë de-përshkallëzimin e çmimeve. Agjencia Franceze e Statistikave – Insee njoftoi në fillim të prillit një ‘vrimë të zezë’ të madhe prej 154 miliardë eurosh në financat publike të Francës.

Kryeministri Gabriel Attal, për më tepër, ka premtuar se në vitin 2027 deficiti buxhetor i Francës do të bjerë në 3% të PBB-së. Dhe në 17 prill, qeveria e tij do të shpallë në Bruksel hartën rrugore të përditësuar që do të ndjekë për të arritur këtë qëllim vendimtar.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.