Franca “frenon” duhanpirjen – Nga 1 janari, çmimi i një pakete cigaresh do të jetë 12 euro
Duhanpirësit francezë që duan të blejnë një paketë cigare do të fusin duart thellë në xhepa në vitet e ardhshme. Qëllimi është të parandalohet fillimi i pirjes së duhanit veçanërisht nga të rinjtë dhe t’u ofrohet duhanpirësve një mbështetje më e mirë në përpjekjet e tyre për ta lënë duhanin.
Ministri i Shëndetësisë, Aurelien Rousseau, prezantoi programin e qeverisë, që parashikuan rritje të çmimit të duhanit dhe cigareve, si dhe masa kufizuese në lidhje me vendin ku lejohet pirja e duhanit dhe ku është i ndaluar.
“Në vitin 2025 çmimi mesatar i një pakete cigaresh do të rritet në 12 euro dhe në 13 euro në vitin 2026”, tha Aurelien Rousseau. Aktualisht, shumë marka shiten në Francë deri në 11 euro. “Rritja e çmimeve është masa më efektive kundër pirjes së duhanit, sipas OBSH-së dhe të gjitha studimeve të pavarura mbi këtë temë”, theksoi Rousseau gjatë prezantimit të programit kombëtar kundër duhanit.
Qëllimi i këtij programi është të “ndërtohet brezi i parë pa duhan deri në vitin 2032” në Francë, siç është zotuar Emmanuel Macron. Për të arritur këtë qëllim, do të vendoset taksa më e lartë dhe do të ndalohet pirja e duhanit, shpjegon ministri i Shëndetësisë.
Në veçanti, qëllimi është të parandalohet fillimi i pirjes së duhanit, veçanërisht tek të rinjtë dhe t’u ofrohet duhanpirësve, veçanërisht atyre me të ardhura të ulëta, mbështetje më e mirë në përpjekjet për ta lënë duhanin. Kjo është arsyeja pse qeveria Macron planifikon t’i bëjë paketat e cigareve më pak të përballueshme duke rritur çmimin e tyre.
Çmimi i një pakete cigare është vendosur të rritet nga 1 janari 2024, me 40 deri në 50 cent si pasojë e inflacionit, sipas vlerësimeve të Konfederatës së Shitësve të Duhanit. Gjithashtu, do të ndalohet shitja e produkteve elektronike, që janë veçanërisht të njohura tek të rinjtë.
Në fund, për vendet ku do të ndalohet pirja e duhanit, Ministria e Shëndetësisë vuri në dukje se ato do të jenë parqet publike, plazhet, pyjet dhe zonat përreth objekteve publike, duke filluar nga shkollat.
Dorian Koça/SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.