Franca, në kaos për shkak të reformës së pensioneve Mbyllen rafineritë, rradhë në pikat e karburantit e mbeturina kudo në rrugë

Reforma e pensioneve dhe miratimi i saj ditët e fundit nga ana e qeverisë në Francë, me një manovër që lejonte miratimin e ligjit pa votim në parlamentin e vendit, vazhdon të shkaktojë protesta të ashpra. Dy rafineritë më të mëdha janë mbyllur nga nënpunësit, dhe pasojat e para janë vënë re në pikat e karburantit. Disa nga rrugët janë bllokuar duke krijuar një situatë kaotike në autostrada, trenat që vijojnë ende qarkullimin janë të pakët, ndërsa grumbullimet e mbeturinave përshkallëzojnë tensionet në Paris. Sindikatat aktualisht po përpiqen që të kontrollojnë fashat më ekstreme të protestiesve. Manifestimet në vend janë të njëpasnjëshme, ndërsa qeveria përgjigjet me policinë anti terro dhe arrestime. Deri tani janë 169 personat që kanë përfunduar në pranga, pas revoltave kundër reformës që rrit me dy vjet moshën e daljes në pension duke e cuar në 64 vjec.

Ndërkohë dy mocionet e mosbesimit ndaj qeverisë të dorëzuara në Asamblenë Kombëtare franceze, pritet të shqyrtohen. Nëse vetëm një nga ato të miratohet qeveria duhet të japë dorëheqjen dhe reforma e kundërshtuar nuk do të jetë më ligj.

Ata që janë vendimtarë në këtë votim janë deputetët republikanë. Disa kanë paralajmëruar tashmë se do të votojnë pro mosbesimit, pasi janë kundër reformës ose nuk janë të kënaqur me përdorimin e nenit 49, paragrafi 3 i Kushtetutës për ta miratuar atë, gjë që i ka hequr Asamblesë Kombëtare mundësinë për tu shprehur.

Reforma do ta bëjë sistemin e pensioneve më të ngurtë, veçanërisht nga pikëpamja e pagesës mujore. Francezët do të mund të dalin në pension në moshën 64 vjeç, por me një gjobë të fortë ekonomike, ndërkohë që kontributi i plotë do të arrihet vetëm duke mbushur 65 dhe 40 vjet kontribute.

Për të mos thënë që synon të ofrojë edhe stimuj ekonomikë për ata që vendosin të qëndrojnë në tregun e punës mbi moshën 64-65 vjeç. Një pikë tjetër që zemëroi gjithë popullsinë dhe të majtën në Parlament. Sipas opozitës së majtë dhe sindikatave, ky mekanizëm favorizon punonjësit jakë të bardhë, drejtuesit e lartë dhe ata që kryejnë punë që nuk janë të lodhshme.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.