Fushatë anti-evazion në Shqipëri. Goditet kontrabanda e naftës me bidona! Bllokohen dyqane që shisnin veshje e telefonë kontrabandë. Në sitë dyqane fizike dhe online

Ditët të fundit Policia e Shtetit është mobilizuar për të goditur rastet e ‘kontrabandës së vogël’ duke bllokuar një serë aktivitetesh të paligjshme. Në listën e operacioneve të realizuara, që ka njoftuar policia janë raste të kontrabandës së naftës me bidona nga Maqedonia e Veriut apo edhe veshje që silleshin pa paguar detryrimet nga Greqia.

Policia e Shtetit ka realizuar disa operacione për bllokimin e mallrave kontrabandë. Referuar njoftimeve zyrtare të Policisë, në Tiranë është finalizuar operacioni “Luxury” ku është arrestuar 1 person, procedura 3 person dhe janë shpallur në kërkim 5 të tjerë pasi trafikonin dhe tregtonin mjete të vjedhura në vendet e BE-së.

Në cilësinë e provës materiale janë sekuestruar 6 automjete dhe 1 motomjet, të dyshuara të vjedhura në vendet e BE-së.

Nga veprimet hetimore ka rezultuar se shtetasit e lartpërmendur kanë bërë ndërhyrje në automjetet e trafikuara, duke modifikuar numrat e shasisë apo paketat elektronike. Më pas automjetet i kanë shitur te persona të ndryshëm.

Një operacion tjetër i realizuar është ai në Korçë ku specialistët e Seksionit për Hetimin e Krimit Ekonomik-Financiar në Drejtorinë Vendore të Policisë Korçë, në vijim të punës për goditjen e aktivitetit kriminal në fushën e kontrabandës me mallra, kanë goditur 1 tjetër rast. Gjatë kontrollit, në banesën e një shtetasi janë sekuestruar 260 litra naftë, e dyshuar e kontrabanduar, e ndarë në 13 bidona plastikë.

Gjithashtu, nga kontrolli i ushtruar në mjetin e tij tip “Mitsubishi”, në pjesën e poshtme të karrocerisë, u konstatua një depozitë e modifikuar, brenda së cilës kishte sasi shtesë karburanti.

Ndërkohë në Kakavie është realizuar operacioni i koduar “Midnight” ku janë sekuestruar mallra të ndryshme ushqimore dhe industriale, të kontrabanduara.

Referuar njoftimit zyrtar, është vënë në pranga drejtuesi i një autobuzi i cili transportoi mallrat kontrabanduara, nga Greqia për në Shqipëri.

Nga kontrolli i ushtruar në bagazhin e autobusit u gjetën mallra të ndryshme ushqimore dhe industriale (37 goma makinash, 200 litra vaj makinash, 5 thasë me konfeksione, 20 pako cigare, 2 kuti me medikamente mjekësore, etj), të cilat ishin të pashoqëruara me dokumentacionin përkatës.

Ndërkohë në Berat është realizuar operacioni “Phones” ku në 3 dyqane janë sekuestruar 95 aparate celulare të dyshuara të kontrabanduara, me vlerë rreth 3.700.000 lekë të rinj.

Një operacion tjetër është ai i realizuar në Tiranë, i emërtuar “Shops”. Në kuadër të këtij operacioni janë vënë në pranga 2 shtetas dhe janë proceduar 6 të tjerë. Në 5 dyqane të ndryshme në Tiranë dhe Durrës  që kishin një administrator të vetëm janë gjetur dhe sekuestruar  produkte të ndryshme, si çanta, veshje, syze dhe parfume, të dyshuara të kontrabanduara.

Një ditë më parë, është realizuar në Lezhë operacioni i koduar “Online” ku janë goditur 2 raste të tentativës për tregtim të mallrave të kontrabanduara. Dy shtetasit e arrestuar janë kapur duke transportuar me furgonët përkatës, mallra të ndryshëm të kontrabanduara, me vlerë totale rreth 1 250 000 lekë të rinj. Dyshohet se mallrat do të shiteshin online.

Po ashtu, dy ditë më parë në Tiranë janë realizuar dy operacione ku janë evidentuar dhe goditur raste të kontrabandës së mallrave të ndryshme.

Gjatë kontrollit të ushtruar nga shërbimet e Policisë, në ambientet e jashtme të banesës së një shtetasi janë konstatuar 2 depozita të vendosura nën tokë, të mbushura me naftë.

Materialet i kaluan Prokurorisë pranë Gjyakatës së Rrethit Gjyqësor Tiranë, për veprime të mëtejshme procedurale.

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.