Gati asfaltimi i rrugës Shkozet-Mbikalimi i Plepave – ARRSH hap tenderin 125 mln lekë. Gjatësia e segmentit, 4.2 km

Aksi rrugor nga nyja e Shkozetit deri të Mbikalimi i Plepave në Durrës do t’i nënshtrohet punimeve për sistemimin dhe asfaltimin e tij. Autoriteti Rrugor Shqiptar ka hapur tenderin për këtë segment, që konsiderohet si tejet i rëndësishëm, sidomos gjatë sezonit veror, për shkak të numrit të lartë të automjetete që shkojnë drejt jugut të vendit. Në total, parashikohet të ndërhyhet në një gjatësi prej 4.2 km, ndërkohë që fondi limit i vënë në dispozicion është rreth 125 mln lekë.

Në dokumentet e tenderit gjendja aktuale e rrugës përshkruhet si tejet e amortizuar, duke qenë se shtresat asfaltike janë të dëmtuara. Ndërkohë që, sipas grafikut të publikuar punimet pritet të zgjatin 2 muaj nga nënshkrimi i kontratës. Sipas ARRSH, ky segment, pjesë e anashkalimit të Durrësit, është shumë i rëndësishëm, pasi shërben për lidhjen e superstradës Tiranë-Durrës nga Nyja e Shkozetit deri në Mbikalimin e Plepave ku lidhet me rrugën Tiranë-Ndroq-Plepa dhe rrugën Plepa-Kavajë-Rrogozhinë.

Ndërkohë që, të gjitha mjetet e zonës së veriut që lëvizin drejt jugut dhe ato të Portit të Durrësit kalojnë në këtë segment rrugor. Rruga kalon nëpër një zonë të dendur urbane dhe i nënshtrohet një trafiku të rënduar ku një pjesë të madhe e zë trafiku i mjeteve të rënda. Për pasojë, plani i menaxhimit të trafikut do të jetë i ndryshueshëm sipas avancimit të punimeve që do të thotë se rrugët alternative për devijimin e trafikut do të ndryshojnë në vazhdimësi deri në përfundimin e punimeve.

Ola Mitre / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.