Gjermania, 1.8 milionë vende të lira pune – Ligji i ri për emigrantët me specialitete të specifikuara

Dhoma Gjermane e Industrisë dhe Tregtisë – DIHK vlerësojnë se në vend ka 1.8 milionë vende të lira pune në një vend me 83 milionë banorë dhe për këtë arsye Berlini ka paraqitur një plan të organizuar për të tërhequr punëtorë të kualifikuar nga jashtë.

Nga Kolumbia në Filipine në Indi, vendi po kërkon specialistë të certifikuar për të punuar në industri, tregti dhe shërbime. Në të njëjtën kohë, qeveria gjermane me legjislacionin e ri ua lehtëson punëtorëve të tillë emigracionin që nga fillimi i këtij muaji.

Për të tërhequr punëtorë të huaj edhe nga vende të treta, jashtë Bashkimit Europian, Gjermania ndryshoi sërish ligjin e emigracionit këtë vit. Nga data 1 mars 2024, ndër të tjera parashikohet mundësia e qëndrimit në vend për të huajt bazuar në përvojën praktike të punës. Njerëzit nga vendet e treta jo të BE-së tani do të mund të punojnë në Gjermani nëse kanë të paktën dy vjet përvojë pune dhe kanë një kualifikim profesional ose të arsimit të lartë të njohur nga shteti në vendin e tyre të origjinës.

Autoritetet në vend përshëndetën rregulloret e reja si një shtyllë të rëndësishme në trajtimin e hendekut të ounëtorëve të aftë të Gjermanisë. Qeveria po përpiqet të reduktojë barrierat burokratike dhe po e bëjnë Gjermaninë më tërheqëse për punëtorët e huaj të kualifikuar.

Nevoja për punëtorë është aq e madhe sa një delegacion nga Gjermania vizitoi Kolumbinë së fundmi për të rritur bashkëpunimin dhe për të joshur punëtorë të kualifikuar.

Në dhjetor, Berlini nënshkroi një marrëveshje imigracioni me Gjeorgjinë. Një marrëveshje e ngjashme bashkëpunimi e ngushtë me Marokun pasoi në janar 2024. Marrëveshjet janë planifikuar gjithashtu me Kenian, Uzbekistanin dhe Kirgistanin.

Një numër prej 43.000 studentëve indianë që studiojnë në Gjermani janë kontaktuar gjithashtu. Ky është numri më i madh i studentëve të huaj në vend, nga i cili Berlini shpreson të tërheqë një fuqi punëtore në një sërë sektorësh për të plotësuar mungesat.

Dorina Kurtaj /SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.