Gjermania, e “sëmura” e Europës! – E vetmja ekonomi e madhe që do të tkurret këtë vit pasi recesioni vazhdon

Gjermania do të vijojë një recesion të zgjatur këtë vit, e vetmja ekonomi e madhe evropiane që përjeton një tkurrje ekonomike gjatë vitit 2023, sipas parashikimeve të reja nga Komisioni Europian.

Ekonomia më e madhe e Europës parashikohet të ketë një rënie prej 0.4% të aktivitetit ekonomik këtë vit, 0.6 pikë përqindje më e ulët se një vlerësim i bërë në maj. Komisioni uli pritjet për ekonominë gjermane në vitin 2024, nga 1.4% në 1.1%.

Ekonomia gjermane ka vuajtur pas pushtimit rus të Ukrainës, me Berlinin që duhet t’i japë fund shumë shpejt varësisë së viteve të energjisë nga Kremlini. Fondi Monetar Ndërkombëtar tha në korrik se Gjermania mund të tkurret me 0.3% këtë vit.

Ekonomistët e kanë quajtur Gjermaninë “i sëmuri i Europës”. Koncepti u krijua në vitin 1998 kur Gjermania u përball me sfida të thella ekonomike. Por, tani kjo periudhë po rishfaqet, pasi Berlini regjistron rënie të thellë të prodhimit.

Të dhënat e publikuara në fillim të shtatorit treguan se aktiviteti prodhues në vend ra me ritmin e tij më të fortë që nga qershori 2009, duke përjashtuar periudhën e pandemisë Covid-19.

Parashikimet e fundit ekonomike tregojnë për një ngadalësim të përgjithshëm në të gjithë rajonin. 27 ekonomitë e BE-së tani pritet të rriten me një ritëm mesatar prej 0.8% këtë vit, krahasuar me vlerësimib prej 1% të bërë në maj.

“Dobësia në kërkesën e brendshme, në veçanti konsumi, tregon se çmimet e larta për shumicën e mallrave dhe shërbimeve po shkaktojnë vështirësi më të mëdha nga sa priteshin”, tha Komisioni Europian. Inflacioni i lartë vazhdon të jetë një nga sfidat kryesore në bllok. Parashikimet e fundit tregojnë se çmimet e konsumit do të ulen në muajt në vijim, por ato ende ka të ngjarë të jenë mbi objektivin e Bankës Qendrore Evropiane prej 2% deri në fund të 2024.

Inflacioni total në zonën e euros, ku 20 vende të BE përdorin të njëjtën monedhë, parashikohet në 5.6% në 2023 dhe më pas në 2.9% në fund të 2024. BQE do të mblidhet të enjten dhe do të njoftojë nëse do të rrisë sërish normat e interesit. Që nga korriku 2022, banka qendrore ka rritur normat me 4.25 pikë përqindjeje në një përpjekje për të ulur inflacionin tejet të lartë në rajon.

Dorian Koça/ SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.