Gjermania, masa për kursimin e gazit – Komisioni i ekspertëve harton draftin. Gati mbështetja për familjet dhe bizneset
Komisioni i ekspertëve në Gjermani, i ngarkuar me hartimin e planeve për të lehtësuar ndikimin e rritjes së çmimeve të gazit te konsumatorët, ra dakord për një sërë propozimesh. Sipas draftit, qeveria do të paguajë për një muaj faturën e gazit të familjeve dhe bizneseve, ndërsa po punohet për një skemë të veçantë për konsumatorët e mëdhenj gazit në sektorin industrial.
Në një fazë të dytë, qeveria mund të subvencionojë 60-80% të konsumit të parashikuar të gazit, ku konsumatorët duhet të paguajnë pjesën e mbetur me çmimet e tregut, duke nxitur kursimet e energjisë. Çmimi i subvencionuar mund të jetë rreth 12-14 cent për kilovat orë.
Nëse miratohet, skema do të paguhet nga paketa e ndihmës prej 200 miliardë euro, që qeveria e kancelarit Olaf Scholz njoftoi në fund të muajit të kaluar për të zbutur ndikimin e rritjes së çmimeve të energjisë në ekonominë më të madhe të Europës.
Komisioni do të paraqesë një raport të ndërmjetëm. Ekspertët thonë se avantazhi i pagesës së faturës së gazit nga qeveria vetëm për një muaj ofron lehtësim të menjëhershëm, por ana negative është se nuk ofron stimuj për të kursyer pavarësisht vlerësimeve se të paktën 20% e kursimeve të gazit nevojiten për të shmangur mungesat.
SCAN
Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.