Gjermania, në gjendje alarmi për spitalet – Më shumë se gjysma e 600 prej më të mëdhenjve do të mbyllen!

Më shumë se gjysma e 600 spitaleve më të mëdha në Gjermani po rezultojnë me humbje, sipas rezultateve të një sondazhi. Situata është veçanërisht e vështirë në klinikat shtetërore, 63 % e të cilave janë në gjendje alarmi, sipas të dhënave të firmës konsulente Roland Berger.

Më shumë se gjysma, 51% e menaxherëve dhe drejtorëve mjekësorë presin që vetëm 1.250 nga 1.900 spitalet aktuale do të mbeten të hapura. Si arsye kryesore, ata përmendën rritjen e peshës së trajtimit ambulator në krahasim me trajtimin spitalor, i cili sjell të ardhura më të larta.

Qeveria gjermane ka shpallur reforma në kujdesin shëndetësor, por vetëm një numër i vogël i të anketuarve presin ndryshime për mirë.

Shumë drejtorë spitalesh e shohin mungesën e stafit si një problem madhor. Mbyllja e disa klinikave mund të sjellë një zbutje të lehtë të problemit, për shkak të “lehtësimit” të një pjese të punonjësve. Ndërsa konsulentët presin bashkime të spitaleve në vitet e ardhshme. Ata u shprehën se administratat e spitaleve duhet të bashkëpunojnë me të tjerët në mënyrë që të arrijnë sinergji dhe të operojnë me më shumë përfitime. Kjo nënkupton zgjerimin e kujdesit ambulator.

Dixhitalizimi, theksojnë ata, do të luajë një rol gjithnjë e më të rëndësishëm në jetën e përditshme spitalore: shumica e drejtuesve të klinikave të anketuar i kushtojnë rëndësinë më të madhe zgjerimit të telemjekësisë, e ndjekur nga inteligjenca artificiale që mund të përdoret, për shembull, në diagnostikimin radiologjik.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.