Gjermania shmang recesionin – Shënohet një rritje modeste në tremujorin e parë

Gjermania pritet t’i shpëtojë recesionit duke regjistruar një rritje modeste në tremujorin e parë të vitit, sipas një raporti të publikuar nga ministria e ekonomisë në vend. Sipas saj një recesion teknik prej dy tremujorësh negativë me radhë duket se është shmangur.

Parashikimet aktuale flasin një rritje të lehtë nga viti në vit të produktit të brendshëm bruto për vitin 2023 në tërësi. Institucionet kryesore ekonomike presin që ekonomia gjermane të rritet me 0.3% këtë vit. Treguesit ekonomikë shfaqin një rritje të dukshme në tremujorin e parë, me prodhimin industrial dhe të ndërtimit që nxit rritjen, duke përfituar nga lehtësimi i pengesave materiale, rënia e çmimeve të energjisë dhe kushtet e favorshme të motit.

Parashikimet e Përbashkëta Ekonomike të institutit tregojnë një zgjerim prej 0.1% të PBB-së në tremujorin e parë. Kjo pason një tkurrje prej 0.4% në tremujorin e katërt të 2022. Ministria foli për një “fillim të favorshëm” të vitit. Dimri i butë dhe nivelet e larta të depozitimit të gazit kontribuan në disponueshmërinë e mjaftueshme të gazit në Gjermani dhe Europë, gjë që u reflektua në një rënie të dukshme të çmimeve të energjisë.

Ndjesia e konsumatorit pritet të vazhdojë rimëkëmbjen e saj në muajt e ardhshëm, megjithëse humbjet në fuqinë blerëse të lidhura me inflacionin vazhdojnë të rëndojnë ekonominë sipas raporteve zyrtare. Normat e inflacionit pritet të vijojnë të zbuten edhe në muajt në vijim, megjithëse mbeten në nivele të larta. Gama aktuale e parashikimit është 5.4% në 6.6% për inflacionin në 2023 dhe 2.1% në 3.5% për 2024 – ën.

Ministria e Ekonomisë sheh rreziqe për perspektivën e saj ekonomike, si konsumi i dobët privat, një përkeqësim i kushteve në ndërtim, problemet e fundit në institucionet financiare dhe pasiguria gjeopolitike për shkak të luftës në Ukrainë.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.