10 nga 20 vendet më të mira për biznes – Ndodhen në Europë. Belgjika dhe Suedia renditen ndër të parat

Ndryshimet në mjedisin e biznesit ndërkombëtar pasqyrojnë sfidat serioze, intensive dhe të paprecedenta me të cilat është dashur të përballet ekonomia botërore vitin e kaluar, siç thekson dhe hulumtimi i këtij viti nga Njësia e Inteligjencës – EIU – e revistës Economist. Konkluzionet e saj kryesore janë dy: nga njëra anë, Kina është “humbja” e madhe për shkak të pasigurisë, tensioneve me SHBA dhe perspektivave më të dobëta, nga ana tjetër, Europa Lindore u godit rëndë nga lufta për sa i përket mundësive të biznesit.

Në ndryshim nga sa më sipër, disa vende të Europës Perëndimore arritën të balancojnë nga njëra anë rritjen e inflacionit dhe krizën e kostos së jetesës, dhe nga ana tjetër relaksimin fiskal të kombinuar me shtrëngimin e politikës monetare. EIU parashikon që për pesë vitet e ardhshme vendet me mjedisin më të mirë të biznesit janë Singapori – me një rezultat total prej 8.7 pikë, Kanadaja – 8.45 pikë, Danimarka – 8.45 pikë, SHBA – 8.37 pikë) dhe Zvicra  – 8.34 pikë).

Dhjetë nga njëzet vendet me mjedisin më të mirë të biznesit janë në Europën Perëndimore, ku, ndërsa perspektivat afatshkurtra janë të ulëta, Fondi i Rimëkëmbjes pritet të mbështesë investimet në dixhitalizim, tranzicionin në një ekonomi të gjelbër dhe energji, por dhe në pavarësinë energjetike nga Rusia. “Fituesit” më të mëdhenj krahasuar me vitin e kaluar janë Belgjika dhe Suedia, dy vende që kanë kërcyer përkatësisht shtatë dhe gjashtë vende brenda një viti. Belgjika vendosi një kuadër më të qartë të investimeve të huaja direkte në fillim të vitit, i cili i kombinuar me politika të tjera dhe vendndodhja e saj favorizon tërheqjen e kapitalit vendas dhe të huaj.

Suedia, nga ana tjetër, tregon, sipas EIU, performancë më të mirë në stabilitetin politik dhe ekonomik. Ajo është gjithashtu një nga ekonomitë më të avancuara teknologjikisht dhe ka bërë përparim të rëndësishëm në largimin nga karburantet fosile ndotëse. Dhe kjo do të thotë se ka aftësinë t’i përgjigjet kalimit në një ekonomi të gjelbër bazuar në dixhitalizimin dhe mbrojtjen e mjedisit.

Përkundrazi, “humbësit” e mëdhenj në Europë janë Sllovakia, e cila u rëndua nga shtrëngimi i politikës monetare, por edhe kostoja e energjisë, e cila rëndoi zinxhirët e furnizimit. Ndër “humbësit” është dhe Serbia, ku aftësitë dixhitale më të ulëta dhe pjesëmarrja më e ulët në tregun e punës kanë peshuar në kontekstin e Kontinentit të Vjetër.

Megjithatë, vetë Kina është “humbësi” më i madh ndërkombëtar, pasi ka rënë nga viti 2022 me 11 vende në total. Sipas Economist Intelligence Unit, ndonëse fundi i politikës shëndetësore të pandemisë ka efekte pozitive për kompanitë me prezencë në Kinë, ndryshimet që vijnë nga drejtimi statik i politikës ekonomike, por edhe nga rritja e kostove, rëndojnë mjedisin e biznesit. dhe kufizojnë mundësitë për investitorët ndërkombëtarë. Për pesë vitet e ardhshme, mjedisi i biznesit i Malajzisë, Tajlandës, Vietnamit dhe Indisë konsiderohet qartësisht i përmirësuar nga ai i Kinës.

Dorina Kurtaj / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.