Gjermania shpëton BE-në / Rimëkëmbja e shpejtë do të shmangë recesionin në Eurozonë për vitin 2023

Rritja ekonomike e Eurozonës ka të ngjarë të jetë më e fortë se sa pritej më parë këtë vit, ndërsa inflacioni do të jetë më i ulët se sa parashikimet në fund të vitit 2022, tha Komisioni Evropian, kryesisht falë një perspektive më pozitive për ekonominë e Gjermanisë.

Krahu ekzekutiv i BE-së tha se rritja ekonomike në 20 vendet që përdorin euron ka të ngjarë të jetë 0.9% këtë vit, në vend të 0.3% të parashikuar nëntorin e kaluar.

Ekonomia gjermane do të rritet lehtë në vitin 2023, parashikoi një raport i ri i publikuar të hënën, një përmirësim në krahasim me parashikimin e saj të mëparshëm për një tkurrje prej 0.6 për qind. Në parashikimet e tij të dimrit, Komisioni Evropian parashikon 0.2 për qind rritje të PBB-së për ekonominë më të madhe të Evropës në vitin 2023, më shumë se sa pritej në vjeshtë për shkak të lehtësimit të çmimeve të energjisë dhe mbështetjes së politikave për familjet dhe firmat.

Pavarësisht përmirësimit të kohëve të fundit në besim, ekonomia pritet të pësojë një rënie tjetër të butë në fillim të vitit 2023, pasi çmimet e energjisë për familjet janë ende në rritje dhe mbështetja e qeverisë për janarin dhe shkurtin do të disbursohet vetëm në mars. Çmimet e konsumit gjerman, të harmonizuara në krahasim me vendet e tjera të Bashkimit Evropian, arritën kulmin në 11.6 për qind në tetor.

Bizneset në të gjithë bllokun gjithashtu do të vazhdojnë të përballen me kosto të larta të energjisë dhe raporti vuri në dukje “inflacioni bazë ishte ende në rritje në janar, duke gërryer më tej fuqinë blerëse”.

Rritja pritet të kthehet në 1.3 përqind në 2024, sipas parashikimeve të Komisionit, por ai paralajmëroi se inflacioni ishte ende një rrezik pasi “presionet e çmimeve mund të rezultojnë më të gjera dhe më të rrënjosura se sa pritej”.

SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.