Gjobë rekord prej 21 milionë paund për një nga firmat kryesore të auditimit në botë!

Gjoba është më e larta e vendosur ndonjëherë nga Këshilli i Raportimit Financiar të Mbretërisë së Bashkuar. Rregullatori i kontabilitetit në Mbretërinë e Bashkuar gjobiti KPMG të enjten me një rekord prej 21 milionë ppaund (24.3 milionë euro) për auditimet e Carillion, kompanisë së ndërtimit që falimentoi në 2018 dhe nxiti një rishikim rrënjësor të standardeve të auditimit.

Rënia e Carillion në janar 2018, së bashku me kolapsin e shitësit me pakicë BHS dy vjet më parë, çuan në tre rishikime të mbështetura nga qeveria të tregjeve dhe standardeve të auditimit.

“Numri, diapazoni dhe serioziteti i mangësive në auditimet të Carillion gjatë periudhës që çoi në dështimin e tij ishte i jashtëzakonshëm dhe minoi besueshmërinë dhe besimin e publikut në auditim,” tha Elizabeth Barrett, këshilltare ekzekutive për Këshillin e Raportimit Financiar në një deklaratë të enjten.

“Kjo reflektohet në sanksionin financiar të vendosur ndaj KPMG LLP, më i larti i vendosur ndonjëherë nga FRC”, shtoi ajo. Gjoba totale, në dy pjesë që mbulojnë dy grupe hetimesh në auditimet e Carillion, do të ishte 30 milionë paund, por u zbrit për shkak të pranimeve dhe bashkëpunimit nga auditori.

Jon Holt, shefi ekzekutiv dhe partneri i lartë i KPMG në Mbretërinë e Bashkuar, tha se gjetjet e FRC-së ishin ndëshkuese dhe auditori ka bashkëpunuar plotësisht me hetimin dhe pranon konkluzionet e tij dhe sanksionet. “Më vjen shumë keq që këto dështime ndodhën në firmën tonë,” tha Holt.

“Është e qartë për mua se puna jonë e auditimit në Carillion ishte shumë e keqe, për një periudhë të gjatë… Që nga ndërmarrja e kësaj pune auditimi, ne kemi bërë një sasi të madhe për të përmirësuar kontrollet dhe mbikëqyrjen në të gjithë firmën tonë, për të siguruar që këto dështime nuk mund të ndodhin më sot”, tha Holt.

Një raport parlamentar në 2018 tha se kolapsi i Carillion ekspozoi “mungesën e forcës” së FRC. Një nga tre rishikimet në auditim rekomandoi zëvendësimin e FRC me një mbikëqyrës më të fuqishëm, megjithëse legjislacioni ende nuk është paraqitur për ta bërë këtë.

Edel Strazimiri / SCAN

Material i përgatitur nga portali SCAN TV.
Ripublikimi mund të bëhet vetëm kundrejt citimit të autorësisë dhe burimit origjinal.